Will Smith flet për shëndetin mendor, zbulon se dikur kishte menduar të vetëvritej

Will Smith ka folur për shëndetin e tij mendor, duke zbuluar në një ‘trailer’ për dokumentarin e tij të ardhshëm që do të publikohet në YouTube se dikur kishte menduar të vetëvritej.

Aktori i “Aladdin”, 53 vjeç, ka qenë në një udhëtim sfidues fitnesi për të humbur 20 kilogramë në 20 javë.

Smith tha se kjo sfidë jo vetëm që e shtyu atë të kthehej në formë, por gjithashtu e ndihmoi të zbulonte “shumë gjëra të fshehura për veten time”.

“Ky filloi si një udhëtim për të hyrë në formën më të mirë të jetës sime. Kur fillova këtë shfaqje mendova se po hyja në formën më të mirë të jetës sime, fizikisht. Por mendërisht, isha diku tjetër”, tha ai në një trailer lansuar të premten për ” Will Smith: The Best Shape Of My Life “.

“Tani unë jam gati t’i tregoj botës se sa pak di për veten time… Ajo që ju keni kuptuar si Will Smith, ylli i alienëve asgjësues, më i madh se ylli i filmave, është kryesisht një ndërtim, me kujdes, karakter i përpunuar dhe i nderuar, i krijuar për të mbrojtur veten, për t’u fshehur nga bota, për të fshehur frikacakun”, vazhdon rrëfimin aktori i famshëm, shkruan NBC News.

Në ‘trailer’, Smith shihet duke u stërvitur. Në një klip tjetër ai shihet i ulur në një tavolinë i rrethuar nga familja e tij.

“Kjo ishte e vetmja herë në jetën time që kam menduar ndonjëherë të vetëvritem”, tha ai duke mos dhënë asnjë kontekst pas deklaratës.

Smith foli gjithashtu për shkrimin e librit të tij të ardhshme “Will “. Ai tha se libri po “ekspozonte shumë gjëra” për jetën e tij, duke përfshirë “aq shumë gjëra që njerëzit nuk i dinë për mua”.

Libri është i disponueshëm për porositje paraprake dhe do të publikohet më nëntë nëntor. Ndërsa, dokumentari debuton në YouTube më tetë nëntor. /Telegrafi/