Drejtoresha e Arsimit në Komunën e Prizrenit, Luljeta Veselaj-Gutaj ka reaguar lidhur me rastin e vrasjes së 15-vjeçares nga prindi i saj, duke kërkuar ndëshkim të rëndë nga organet e drejtësisë.
Zyrtarja e lartë komunale ka bërë të ditur se është tronditur thellë nga ngjarja që ka ndodhur në orët e hershme të mëngjesit të ditës së martë.
“Një krim makabër u krye ndaj dy vajzave të pafajshme e një nëne – nga ai i cili, në vend që ti mbronte, ishte vetë dorasi. Një akt i rëndë, i kryer nga një njeri i zhveshur nga çdo normë morale, njerëzore dhe shoqërore duhet dënuar fort. Uroj që drejtësia ta ndëshkojë rëndë”, ka shkruar Veselaj-Gutaj, raporton Telegrafi.
Një rast i vrasjes së rëndë kanë ndodhur të martën rreth orës 05:30, në rrugën “Shote Galica” në Prizren, brenda një familjeje me shtetësi të Turqisë.
Sipas të dhënave nga organet e hetuesisë dyshohet se babai ka privuar nga jeta vajzën rreth moshës 15-vjeçare, derisa vajza tjetër 10 vjeçare ka pësuar lëndime. Lëndime ka pësuar edhe bashkëshortja, teksa i dyshuari është vetëlënduar. /Telegrafi/
