Ursula von der Leyen ka zbuluar propozimin e saj të shumëpritur për buxhetin e ri të Bashkimit Evropian, me vlerë 2 trilionë euro midis viteve 2028 dhe 2034, një rritje e konsiderueshme krahasuar me 1.21 trilionë euro të miratuar nga udhëheqësit në verën e vitit 2020.
"Është më strategjik, më fleksibël, më transparent", tha presidentja e Komisionit Evropian të mërkurën pasdite, shkruajnë mediat e huaja, përcjell Telegrafi.
"Ne po investojmë më shumë në aftësinë tonë për t'iu përgjigjur dhe më shumë në pavarësinë tonë".
Siç bëhet e ditur më tej, plani i saj rimodelon strukturën e buxhetit përgjatë tri shtyllave kryesore:
- 865 miliardë euro për bujqësinë, peshkimin, kohezionin dhe politikën sociale.
- 410 miliardë euro për konkurrueshmërinë, duke përfshirë kërkimin dhe inovacionin.
- 200 miliardë euro për veprim të jashtëm, duke përfshirë 100 miliardë euro për Ukrainën.
Ndërsa kontributet direkte nga shtetet anëtare do të mbulojnë pjesën më të madhe të buxhetit, von der Leyen parashikon gjithashtu taksa të reja në të gjithë BE-në mbi mbeturinat elektrike, duhanin dhe të ardhurat e korporatave të mëdha për t'i lejuar Brukselit të mbledhë të ardhura shtesë vetë. /Telegrafi/
