“Vetvetja”: Piktori Lendrit Lluka ekspozon mbi 150 punime në Galerinë e Arteve në Pejë

Në Galerinë e Arteve në Pejë të premten është hapur ekspozita personale e piktorit pejan, Lendrit Lluka.

Në ekspozitën e titulluar “Vetvetja”, piktori Lluka ka paraqitur mbi 150 punime të punuara ndër vite.

Ai në një bisedë për Telegrafin tha se kjo është ekspozita e tij e dytë.

“Kjo është ekspozita ime e dytë. Në këtë ekspozitë kam paraqitur mbi 150 punime të mija, të cilat i kam punuar ndër vite. Janë vepra të dizajneve të ndryshme”, tregoi Lluka.

Lexo po ashtu Lëndrit Lluka - artisti që flijon artin në gotat e qelqit

Mes tjerash, ai tha se pikturat i përkasin zhanreve të ndryshme dhe se nuk është i orientuar në një zhanër të vetëm.

“Asnjëherë nuk jam i orientuar në një zhanër. Çdo herë e gjej veten në secilën pjesë, siç janë ato të portreteve, qoftë të natyrës. Pra, gjithçka me një fjalë që i përket vetëm artit”.

Lluka tutje u shpreh se talenti i tij u zbulua që në moshën 3-vjeçare, kur ai ishte në një zyrë gjeodezie.

Pas kësaj, ai vazhdoi të ndjekë pasionin e tij për artin dhe këtë pasion e ruajti deri në ditët e sotme.

Megjithatë, ai studion mjekësinë, një fushë krejtësisht e ndryshme. Arti për Llukën është një pasion që ai e ndjek në kohën e lirë.