Në mars të vitit 2023, Manchester United pësoi një nga humbjet më të turpshme në historinë e derbit me Liverpoolin, me rezultat 7-0 në Anfield.
Por përveç rezultatit, një moment para ndeshjes mori vëmendje të madhe: sulmuesi Wout Weghorst u pa duke prekur tabelën e famshme “This Is Anfield” në tunelin e stadiumit – një zakon tradicionalisht i rezervuar për lojtarët e Liverpoolit.
Ky gjest u prit me zemërim nga tifozët e United, të cilët e akuzuan për mungesë përkushtimi ndaj klubit. Por Weghorst u përgjigj publikisht, duke thënë se veprimi ishte për të ngacmuar bashkëkombasin e tij, Virgil van Dijk, dhe jo një akt adhurimi ndaj Liverpoolit.
“Nga kombëtarja e di që Virgil gjithmonë e prek atë shenjë. E bëra për ta ndalur, për t’i prishur ritualin. Ishte vetëm një lojë psikologjike”, shkroi Weghorst në rrjetet sociale.
Ai gjithashtu mohoi zërat që e lidhin me Liverpoolin që nga fëmijëria, duke theksuar se gjithmonë ka qenë tifoz i Twentes dhe se është krenar që mbron ngjyrat e Manchester United.
Gjesti i tij mori edhe më shumë vëmendje kur në rrjetet sociale u rikujtua një deklaratë nga viti 2018, ku Weghorst thuhej se kishte ëndërruar të luante për Liverpoolin – diçka që ai tashmë e mohoi.
Për këtë tabelë ikonike ka folur edhe trajneri Jurgen Klopp, i cili kishte thënë dikur se nuk u lejon lojtarëve të tij ta prekin atë derisa të fitojnë diçka për klubin, duke e konsideruar si një simbol respekti dhe jo thjesht traditë.
Gjithsesi, për Weghorst, gjithçka kishte një motiv personal – edhe pse rezultati në fushë tregoi një tjetër histori. /Telegrafi/
