Veseli: Luftën kundër korrupsionit do e fitojme me SHBA-të sikurse fituam luftën kundër Serbisë

Kandidati i PDK-së për Kryeministër të ardhshëm të Kosovës, Kadri Veseli, është pritur sonte nga aktivistë të shumtë në Mitrovicë.

Këtë e ka bërë të ditur përmes një statusi në Facebook.

Gjatë takimeve, Veseli ka shpalosur planin e tij kundër korrupsionit i cili do të nisë të jetësohet në 100 ditëshin e parë të qeverisjes.

“Me aktivistë të shumtë të PDK-së në Mitrovicë diskutova për Planin Kundër Korrupsionit. Një prej nismave kryesore do të jetë Byroja Anti Korrupsion, që do të ndërtohet bazuar në modele të vendeve të tjera me struktura të veçanta kundër korrupsionit, të cilat kanë korrur shumë suksese.

Brenda 100 ditëve të para si kryeministër do t’i nisi hapat për t’i hartuar ligjet e nevojshme për krijimin e saj. I gjithë procesi do të jetë i mbështetur dhe i monitoruar nga partnerët amerikanë dhe të tjerët, për të siguruar maksimumin e autonomisë dhe efikasitetit”, ka thënë Veseli.

Në fund ka shkruar se Kosova e fitoi luftën kundër Serbisë në bashkëpunim me SHBA-në dhe së bashku me ta do ta fitojë edhe luftën kundër korrupsionit dhe nepotizmit, njofton Telegrafi.