Vëllaznimi fiton Ligën Unike pas një finaleje dramatike ndaj Prishtinës 

Vëllaznimi i Gjakovës është shpallur kampion i edicionit të katërt të Ligës Unike, duke mposhtur Sigal Prishtinën me rezultat 91:88 pas vazhdimeve.  

Ndeshja e zhvilluar në Pallatin e Rinisë dhe Sporteve në Prishtinë, ishte dramë që u vendosë në sekondat e fundit. 

Sigal Prishtina ishte në epërsi 78:77 kur Arian Azemi, katër sekonda para fundit, realizoi vetëm njërën nga dy gjuajtjet e lira për barazim 78:78.  

Rashid Mahalbasic bëri një pasim të gabuar, ndërsa Arbër Sinani nga Vëllaznimi nuk arriti të shënonte për tri pikë një sekondë para fundit, duke e çuar ndeshjen në vazhdime. 

Në pesë minutat shtesë, Vëllaznimi tregoi më shumë qetësi. Kapiteni Atik Koshi shënoi dy pikë nga gjuajtjet e lira për 89:86, ndërsa Clark i Prishtinës ngushtoi në 89:88.  

Në kundërsulm, Sinani realizoi për 91:88. Fisnik Rugova provoi për tri pikë nga gjysma e fushës, por dështoi, duke konfirmuar fitoren e Vëllaznimit. 

Arian Azemi ishte lojtari më i mirë i ndeshjes me 24 pikë, gjashtë kërcime dhe tri asistime. Te Prishtina u dallua Mahalbasic me 19 pikë, nëntë kërcime dhe katër asistime, por të pamjaftueshme për të shmangur humbjen. 

Turneu i Ligës Unike u mbyll pa ndeshje për vendin e tretë, pasi Golden Eagle Ylli refuzoi të luante ndaj Besëlidhjes për shkak të mbingarkesës dhe lëndimeve. Ylli kishte fituar edicionin e parë të Ligës Unike, ndërsa Peja dhe Trepça triumfuan në dy edicionet pasuese. 

Te basketbollistet, Flamurtari u shpall kampion i Ligës Unike, duke mundur Pejën 03 në finalen e mbajtur në Vlorë./Telegrafi/