VARRI MASIV, PADALISHTË

Poezi nga: Chris Agee
Përktheu: Fadil Bajraj

Një stom i vogël. Nëntë varre të reja. Për herën e dytë
Në dy ditë në fushat e vrasjes,
Lot të brendshëm … Ishte e qartë

Se Afrimi i vogël përkujtohej në kodrën matanë,
Këtu qe varrosur. Nëna dhe Babai dhe gjashtë motrat e tij
Në radhë ngushëlloheshin drejt vogëlsisë së tij pesëvjeçare

I gjithë farefisi Imeraj
Emrat dhe moshat e të cilëve sapo i shënova
Në pamjen e varreve të kushërinjve të tyre poshtë sukës së baruar –

Shiriti valëvitet, një instruktor i vetëm në horizont –
Ende duke e ngopur ajrin
Me erë të amshtë të
Trupave të vdekur

Spanjollët e djeshëm janë zhvendosur. Po djersitem,
Pluhuri m’i ka mbuluar çizmet,
I ndiqja të tjerët teposhtë kthesës së autostradës

Për në këtë të çarë të tokës buzë
Kullosës gjembake, larg larg nga patosi abstrakt
I shenjës së drunjtë

Ku u ndjeva i zhytur
Në izobarin e brendshëm të thellësisë së papritur
Gushti në Kosovë.

Krejt arkipelagu i bukurisë dhe i terrorit i këtij çasti
Që ndihej i shkrumbosur si një mbretëri e lartë e momenti të Urit
Përmes ozonit të ndërgjegjes. Ku MUP-i ishte dirgjur

Shtigjeve malore për në Serbi
Si djall malor në epikën finlandeze,
Ku Abrahami ka mundur ta therte farën e tij,

Ne qëndrojmë para faktit të thjeshtë në
Qetësi, shikimet ndeshen, katastrofë murmuritet
Në gjuhën shqipe. Skutem, duke ngacmuar

Plisin sikur ta prekja tragjedinë e tij,
Duke e paramenduar disi ballin e djersitur të çunit,
Sa shumë ka qenë i dashur,

Pabesueshmëria e futjes së plumbit
Si kokë ngulitëse
Në të njëjtën kafkë. Ngriten,

Lotët e brendshëm …
Sikur e brendshmja të gërryente, duke dëgjuar
Kërcitjen, përbrenda, e hapave tanë në rrugën e pashtruar

Drejt shtëpive të djegura dhe rrafshnaltave kodrinore
Aty ku jetërat e tyre mbaruan,
Ku bari i thatë është mbushur me lulefushe dhe shkëlqim,

Ku gjumashët e hijes larisin rrugën;
Marrin, derisa kthehen,
Nga galina, kërcejnë

Të zbehur si ndonjë fije paçavureje; nga gjembi
Afër kapicës së Afrimit, një tojë këpucësh e lidhur për një spango plastike;
Disa hapa më tej, një shufël çorape.

/Telegrafi/