Vala e të nxehtit dërgon 11 amerikanë në spital gjatë tubimit të parë të Trumpit pas dënimit penal të tij

Vapa ekstreme në Arizona ka dërguar 11 persona në spital ndërsa mijëra njerëz prisnin të hynin në një tubim me ish-presidentin Donald Trump.

Ndërsa Trump doli në skenë në Phoenix, temperatura ishte 44 gradë Celsius.

Bëhet e ditur se ky ishte tubimi i tij i parë që nga dënimi penal në New York, që e shpalli atë fajtor për falsifikimin e të dhënave në lidhje me një pagesë për aktoren e filmave për të rritur Stormy Daniels.

Trump përdori fushatën për të përsëritur deklaratën se çështja kundër tij ishte e motivuar politikisht dhe bëri thirrje për rrëzimin e dënimit, shkruan BBC, përcjell Telegrafi.

“Sapo kalova një gjyq të montuar në New York. Ishin gjëra të sajuara, të fabrikuara”, tha Trump.

Ndërsa mbështetësit e tij prisnin jashtë tubimit, disa njerëz u dërguan në spital nga nxehtësia e madhe.

Edhe Shërbimi Kombëtar i Motit (NWS) ka parashikuar temperatura rekord në Kaliforni dhe pjesë të Nevadës dhe Arizonës.

Siç raportohet, ish-presidenti foli për rreth 90 minuta përpara se të nisej për një mbledhje fondesh në San Francisko.

Përveç dënimit të tij, ai tha se do të anulonte urdhrin e ri ekzekutiv të presidentit aktual të SHBA-së, Joe Biden, që synon të frenojë ardhjet e emigrantëve në kufirin SHBA-Meksikë.

Trump më pas pritet të mbajë një fushatë në Las Vegas, edhe ky qytet me temperatura rekord.

Ndryshe, vapa e madhe ka vendosur më shumë se 30 milionë njerëz në të gjithë rajonin jugperëndimor nën alarm për temperatura të larta të rrezikshme, me zyrtarët që u kërkojnë banorëve të marrin masa paraprake.

Sëmundjet e lidhura me nxehtësinë dhe madje edhe vdekja po bëhen më të zakonshme në Phoenix dhe rajone tjera.

Muaji i kaluar ishte maji më i nxehtë i regjistruar në histori. /Telegrafi/