70 për qind e popullatës pritet të vaksinohet deri në fund të vitit, Haxhiu tregon pse infermieret nuk përdorin dorëza gjatë procesit të vaksinimit

Shefja e vaksinimit në Institutin Kombëtar të Shëndetësisë Publike të Kosovës, Edita Goranci Haxhiu ka bërë të ditur se janë angazhuar 280 punonjës për ta kryer procesin e vaksinimit.

Goranci-Haxhiu u shpreh se nga e enjtja është planifikuar që vaksinimi të bëhet edhe nëpër qytetet e tjera.

Sipas saj, mënyra më e mirë për të kryer vaksinimin është pa përdorur dorëza nga punonjësit shëndetësor, teksa theksoi se të gjithë të angazhuarit janë të trajnuar për të kryer vaksinimin.

“Mënyra më e lehtë edhe më e mirë me vaksinuar është pa dorëza, meqenëse duhet të dezinfektohen duart një pas një. Të gjithë personat që vaksinojnë janë të trajnuar për të dhënë këtë vaksinë”, tha ajo në një prononcim për medie pas fillimit të vaksinimit në Klinikën Infektive.

Epidemiologia tha se deri në fund të vitit planifikohet që të vaksinohet 70 për qind e popullsisë.

“Deri në 70 për qind të popullsisë së Kosovës është planifikuar që të vaksinohen. Nga e enjtja planifikohet që të kalojmë edhe nëpër qytetet tjera. Me prioritet do të vaksinohen punonjësit shëndetësor të cilët janë në punë në repartet ku janë të shtrirë pacientët. Janë 280 persona të angazhuar për të kryer procesin e vaksinimit, të gjithë janë të trajnuar”, u shpreh ajo. /Telegrafi/