Ukrainasit zënë rob nëntë ushtarë rusë

Ushtria ukrainase gjatë një operacioni në lindje të vendit, ka arritur të zë rob lufte nëntë ushtarë rusë.

Disa prej tyre ishin nga rajoni që së fundmi në mënyrë të kundërligjshme dhe të njëanshme është shpallur “republikë”, dhe menaxhohet nga pro-rusët, transmeton Telegrafi.

Ata ishin pjesëtarë të këmbësorisë që kishin mbetur pa tanket e tyre, që u janë shkatërruar nga ukrainasit.

Disa prej tyre shiheshin të lënduar me gjasë gjatë luftimeve, kurse derisa u identifikuan u konstatua se janë nga Donetsku, rajon ky që është nën kontrollin e rusëve.

Lexo po ashtu Ukraina po bëhet gati - videoja tregon se si forcat ukrainase po bënin shkarkimin me shumicë të minave anti-tank

Ukrainasit dëgjohen duke i marrë në pyetje në një zonë malore që ishte mbuluar nga bora, dhe nga ta kërkohej që t’ua dorëzojnë letërnjoftimet për t’i legjitimuar.

Në anën tjetër, Kievi ka njoftuar se shumë ushtarë rusë që u rekrutuan së fundmi pas urdhrit të Vladimir Putinit për mobilizim të pjesshëm, janë dorëzuar vullnetarisht.

Shumë prej tyre janë shprehur të zhgënjyer me eprorët e tyre, për të cilët thonë se i kanë përdorur si “mish për top”. /Telegrafi/