U raportua se lojtarëve të Arabisë Saudite u janë dhuruar makina Rolls Royce – vjen reagimi i trajnerit Renard

Hevre Renard ka kritikuar raportimet se lojtarëve të tij u janë dhënë makina Rolls Royce si një shpërblim për fitoren e tyre befasuese ndaj Argjentinës.

Lionel Messi kaloi ekipin e tij në avantazh nga penalltia, por arabët shënuan dy herë radhazi për t’i dhënë fund serisë së pamposhtur të favoritëve prej 36 ndeshjesh.

Dhe trajneri francez i sauditëve shtoi se ekipi i tij tani e tutje do të merret më seriozisht dhe nuk janë vetëm një skuadër e thjeshtë.

Por, Renard këmbënguli se asnjë nga lojtarët e tij nuk ka marrë dhurata nga familja mbretërore e vendit.

“Nuk ka asgjë të vërtetë për këtë. Kemi një federatë dhe një ministri shumë serioze të sportit. Nuk është koha për të marrë diçka në këtë moment”, ka thënë ai.

“Ne kemi pasur vetëm një ndeshje dhe kanë mbetur edhe dy ndeshje shumë të rëndësishme. Dhe ne shpresojmë për më shumë”.

“Nuk e di nëse ju kujtohet konferenca për shtyp para ndeshjes së Argjentinës. Kjo është një nga tre ndeshjet e rëndësishme që duhet t’i luajmë”.

“E vetmja gjë e mirë në fund të kësaj faze grupore është të përfundojmë në vendin e parë ose në të dytin”.

“Ne jemi ende ekipi i fundit i këtij grupi për nga eksperienca. Për momentin asgjë nuk ndryshon. Asgjë nuk ndryshon te favoritët për këtë Botëror. Ne po ruajmë përulësinë tonë. Nëse na mungon përulësia jonë, ne nuk do të luajmë mirë”, ka shtuar ai.

Në rast të fitores ndaj Polonisë, Arabia Saudite do të kalojë në 16-shen e fundit vetëm për herë të dytë. /Telegrafi/