U arratis nga burgu, Policia e shpall person në kërkim Faton Hajrizin

Policia e Kosovës e ka shpallur person në kërkim Faton Hajrizin, i cili është arratisur të shtunën (06.07.2024) nga Qendra Korrektuese në Smrekonicë.

Organet e rendit kanë kërkuar nga qytetarët që për çdo informatë që ndërlidhet me Hajrizin apo vendndodhjen e tij, të lajmërojnë Policinë e Kosovës.

“Policia e Kosovës-Drejtoria Rajonale e Policisë në Mitrovicën e Jugut, me autorizimin të prokurorit të  Prokurorisë Themelore në Mitrovicë,  është autorizuar të publikoj fotografinë e  të arratisurit të poshtë shënuar me shpresë se në bashkëpunim me mediat dhe  qytetarët do të bëhet e mundur lokalizimi dhe arrestimi i personit  të shpallur  në kërkim”, thuhet në komunikatën e Policisë, transmeton Telegrafi.

Më tej thuhet se “personi  i shpallur në  kërkim  Faton Hajrizi,  sot me datën 06.07.2024, është raportuar se është arratisur nga Qendra Korrektuese në Smrekovnicë të Vushtrrisë”.

“Policia e Kosovës kërkon nga qytetarët e Republikës së Kosovës që për çdo informatë që ndërlidhet me personin në kërkim apo vendndodhjen e tije, të lajmëroj Policinë e Kosovës. Informatat për personin në kërkim, mund të dërgoni  në Stacionin Policor me të afërt, përmes telefonit apo edhe përmes aplikacionit ‘Lajmëro Policinë’”.

Numrat e telefonit dhe adresat elektronike kontaktuese për të kontaktuar Policinë e Kosovës: – 192, – +383 (0)28 532 366-Drejtoria Rajonale  Mitrovicë Jugu.  044/355 108,  E-mail adresa: info@kosovopolice.com.

Ndryshe, Shërbimi Korrektues i Kosovës njoftoi sot se një i burgosur është larguar nga Qendra Korrektuese e Smrekonicës, institucion i tipit të hapur.

Telegrafi nga burimet e veta mëson se i burgosuri është Faton Hajrizi, i dënuar për vrasjen një ushtari rus në vitin 2000.

Shërbimi Korrektues i Kosovës ka bërë të ditur se për largimin e tij nga institucioni është përgatitur letërrreshtimi dhe është njoftuar edhe policia.

Lidhur me rastin, deri në përfundim të hetimeve, është suspenduar oficeri i dhomës së vëzhgimit, F.R dhe oficeri i krahut, N.A.

Kjo nuk është hera e parë që Faton Hajrizi ikën nga burgjet e Kosovës.Në një rrëfim të tij, të dhënë për RTV Dukagjini, dy vjet më parë, ai kishte treguar se ka ikur nga burgjet plotë tetë herë. Faton Hajrizi ishte dënuar për vrasjen e një ushtari rus.

Në kohën kur ai e kishte kryer vrasjen ishte vetëm 15-vjeçar. Për këtë vrasje, ai ishte dënuar 27 vjet burg.Por, siç rrëfente vetë Hajrizi, tre ditë pasi u dërgua në burgun e Mitrovicës, ai kishte arritur të ikte nga atje. Ngjarja kishte ndodhur në vitin 2000.

Për ikjen e tij të parë nga burgu, ai tregoi se kishte shfrytëzuar dritaren e banjës së burgut në Mitrovicë. Hajrizi ishte arrestuar më pastaj nga ushtarët e KFOR-it.

Siç ka treguar vetë, arratisjen e dytë e kishte bërë nga burgu i Prishtinës ndërsa, një herë ishte ikur edhe nga një bazë ushtarake.

Në vitin 2012, Faton Hajrizi ishte arratisur nga burgu i Prizrenit duke u ngjitur në murin e burgut e duke kaluar rrethojat me gjemba.

Pas një aksioni të policisë, ai ishte arrestuar.Në korrik 2007, ai ishte arratisur nga Burgu i Dubravës, së bashku me gjashtë të burgosur të tjerë, të dënuar për krime të rënda.Pasi kishin kaluar rrethojat e burgut, shtatë të burgosurit ishin pritur nga persona të tjerë, të cilat kanë filluar të shtënat kundër rojave të burgut.

Pas hetimeve ishin arrestuar disa punonjës të Burgut të Dubravës dhe disa persona të tjerë që dyshohej se kishin ndihmuar arratisjen.

Pak muaj pas arratisjes, në shtator 2007, ka kishte ndodhur një grabitje me armë në Drenas, ku katër persona me armë dhe maska kishin grabitur një argjendari dhe gjatë ikjes kishin plagosur me armë zjarri dy policë dhe pronarin e dyqanit. Vlera e arit të grabitur ishte rreth 63 mijë euro.

Gjatë vazhdimit të kërkimit të grabitësve, në fshatin Bruznik-Vushtrri, një patrullë e policisë kishte tentuar ta ndalojë një veturë të dyshuar.

Të dyshuarit nga ajo veturë kishin shtënë në drejtim të policisë dhe kishin plagosur me armë zjarri dy policët dhe kishin arritur për të ikur në këmbë.

Dyshohet se të njëjtit kishin kryer grabitjen dhe plagosjen në Drenas. Faton Hajrizi dhe Burim Basha ishin arrestuar në tetor 2007 në një shtëpi në lagjen Bregu i Diellit në Prishtinë. Gjatë bastisjes janë gjetur disa armë.  /Telegrafi/