Trashëgimia muzikore e Nijazi Bytyqit do të nderohet me një mbrëmje të veçantë artistike

Albumi i njërit prej nismëtarëve të muzikës pop-rock në Kosovë, Nijazi Bytyqi, do të promovohet të premten mbrëma në “Autostrada Hangar 2” në Prizren. Në të njëjtën mbrëmje djemtë e muzikantit të ndjerë, Elvis dhe Gjulian Bytyqi do të paraqiten me performancë muzikore.

“Dyshja e talentuar Elvis dhe Gjulian Bytyqi do të sjellë një interpretim magjepsës të repertorit për dy kitara, të përgatitura ekskluzivisht për këtë mbrëmje”, thuhet në njoftim, raporton Telegrafi.

Paralelisht, përmes promovimit të albumit, do të kremtohet krijimtaria e Nijazi Bytyqit, i cili me muzikën e tij kishte frymëzuar e kontribuar për zhvillimin e muzikës argëtuese në Kosovë.

“Albumi përfshin një përmbledhje të këngëve ikonike nga tre grupe legjendare: “Marimangat”, “Therandosët”, “Lunijazët””, thuhet në njoftim.

Në të njëjtën kohë theksohet se “kjo ngjarje është një homazh për muzikën që ka shënuar breza dhe vazhdon të frymëzojë artistë të rinj”, duke ofruar “një mundësi unike për të përjetuar muzikën e grupeve legjendare të përmbledhur në albumin “Nijazi Bytyqi””, raporton Telegrafi.

Albumi “Nijazi Bytyqi” përfshinë 22 këngë hite, si “Eja e Dashur”, “Oh, Barcelona”, “Mos qaj Dashuri”, “Tereza”, “Oh, me sa Zjarr që të Dua”, etj.

Këngët janë nga periudha të ndryshme të karrierës së Nijazi Bytyqit, duke filluar nga grupi i parë “Marimangat”, i cili ka qenë aktiv gjatë viteve 1968-69, pastaj grupi i dytë “Therandosët, i viteve 1970-71, dhe në fund, grupi “Lunijazët, grupi i viteve 1974-1977. /Telegrafi/