Transferimi i ri i Prishtinës, Atanda: I lumtur që jam në Kosovë, pres të kemi suksese si klub

Qendërmbrojtësi Sodiq Ololade Atanda i lindur në Nigeri dhe me pasaportë shqiptare, ka nënshkruar me kampionin aktual të Kosovës, Prishtina.

Ai ka thënë se është i lumtur që ka ardhur në Kosovës, duke shtuar se pret që me eksperiencën që ka ta ndihmojë klubin drejt sukseseve të reja.

“Unë si pjesë e këtij klubi pres të fitoj edhe më tutje eksperiencë duke rifilluar prej aty ku u transferova dhe shpresoj që do t’i jap klubit mbështetjen time maksimale për të shkuar sa më lartë karshi pritshmërive tona dhe unë do të isha krenar që unë bashkë me  shokët e ekipit të korrim sukses në këtë sfidë të re dhe kampionat të ri”.

“Jam tejet i lumtur që vij këtu sepse ndihem si në shtëpi ngase Kosova është afër Shqipërisë dhe siç e dini unë jam me pasaportë shqiptare dhe kisha eksperiencë të jashtëzakonshme gjatë qëndrimit tim atje”.

“Mezi pres që të takohem edhe me tifozët tanë, të cilëve dëshiroj të ju tregoj se çfarë jam i gatshëm të bëjë këtu për ekipin tonë, duke dhënë 100%-shin e kapacitetit tim, me punë dhe përkushtim”, ka thënë Sodiq Atanda për faqen e klubit.

Prishtina në javën e parë do të luajë ndaj Malishevës si mysafir, ku Atanda pritet të debutojë. /Telegrafi/