Trajneri i njohur i fitnesit, Egzon Shkololli, i cili është një nga figurat më të njohura në disiplinën e CrossFit-it në Kosovë, ka ndarë së fundmi një video motivuese në rrjetet sociale, duke dhënë një mesazh të fuqishëm për të gjithë ata që synojnë suksesin në këtë fushë.
Në videon e publikuar, Shkololli dëgjohet duke thënë: "Unë gjithmonë them dhe synimet i kam pasur të jem më i miri prej krejtve, dhe nëse don të bëhesh më i miri duhet të harrosh familjen tënde, të harrosh shëndetin, të harrosh gjërat e mira, duhet t’ia bësh bllok vetes nja 10 vite të mira dhe të kesh fokusin se nga duhet të shkosh – dhe unë të garantoj ty që ti do të bëhesh i fortë".
Ky mesazh ka ngjallur diskutime të shumta në rrjet, me shumë ndjekës që e kanë përkrahur si një qasje ekstreme, por efektive për të arritur majat në sport dhe fitnes. Të tjerë kanë komentuar mbi sakrificat që vijnë me një mënyrë jetese kaq rigoroze.
Egzon Shkololli është i njohur për disiplinën dhe dedikimin e tij ekstrem ndaj CrossFit-it, një metodë stërvitjeje që kërkon forcë, qëndrueshmëri dhe përkushtim maksimal.
Ai vazhdon të ushtrojë aktivitetin e tij në qendrën sportive "Illyrian", ku trajnon sportistë dhe entuziastë të fitnesit, duke promovuar një qasje intensive ndaj stërvitjes dhe suksesit fizik.
Mesazhi i tij është një kujtesë për të gjithë ata që ndjekin këtë rrugë se suksesi kërkon sakrifica, disiplinë dhe fokus të palëkundur. Por mbetet pyetja: A është një qasje e tillë e duhur për të gjithë, apo suksesi mund të arrihet edhe pa sakrifica ekstreme? /Telegrafi/
