Tragjedia me dhjetëra të vdekur, pamje që thuhet se u bënë pak para rrëzimit të aeroplanit në Nepal dhe u publikuan në Facebook Live nga një pasagjer

Momentet e fundit të një aeroplani në Nepal, i cili u rrëzua në tokë, duke vrarë të paktën 68 persona në bord, duket se janë transmetuar në Facebook Live nga një prej pasagjerëve të tij.

Sipas mediave të huaja, përcjell Telegrafi, videoja duket se tregon brendësinë e aeroplanit disa momente përpara katastrofës, e cila ndodhi teksa aeroplani zbriste në aeroportin e sapohapur në qytetin e Pokhara.

Pamjet, të cilat supozohet se janë marrë nga një indian i quajtur Sonu Jaiswal, tregojnë pasagjerët duke buzëqeshur ndërsa aeroplani fluturon mbi shtëpi.

Logoja e Yeti Airlines është e dukshme mbi shpatullën e z. Jaiswal dhe një reklamë sigurimesh nepaleze mund të shihet në tabakanë e linjës ajrore.

Dhe videoja vazhdon, përpara se kamera të fillojë papritur të dridhet dhe pasagjerët të dëgjohen duke bërtitur.

Vërtetësia e pamjeve nuk është konfirmuar në mënyrë të pavarur nga MailOnline, megjithëse Times of India thotë se ka folur me kushëririn e Jaiswal, i cili konfirmoi se 29-vjeçari ishte në aeroplan.

Përplasja përfshiu një aeroplan ATR 72 me dy motorë të drejtuar nga Yeti Airlines, i cili kishte kryer një fluturim gjysmë ore nga kryeqyteti Nepalian Katmandu në Pokhara.

Në bordin e aeroplanit ndodheshin 72 persona, ku përfshiheshin 15 të huaj, dhe të paktën 68 dihet se kanë vdekur pasi ai u rrëzua në një grykë pranë aeroportit të ri të qytetit.

Autoriteti i Aviacionit Civil të Nepalit tha se ende nuk dihet se çfarë e shkaktoi katastrofën. /Telegrafi/