Tony Blair mund të akuzohet për krime lufte në Irak

Jeremy Corbyn, politikani britanik lideri aktual i Partisë Laburiste, është përgatitur për të kërkuar hetime për ish kryeministrin Tony Blair, për krime të luftës të kryera në luftën e Irakut.

Kërkesa për hetime do të paraqitet me 6 korrik të këtij viti, pasi të analizohen dëshmitë se si ka vepruar qeveria e asaj kohe gjatë këtij konflikti, shkruan The Independent, transmeton Klan Kosova.

Corbyn ka thënë se kushdo që ka kryer krime në Irak, duhet të gjykohet për to.

“Nëse Tony Blair ka kryer krime lufte, po duhet gjykuar. Kushdo që ka bërë gjëra të tilla duhet dënuar”, ka thënë ai.

“Mendoj se ishte një luftë e paligjshme. Jam shumë konfident për këtë, e edhe Kofi Annan e kishte konfirmuar se ishte një luftë e paligjshme”.

Corbyn është një kundërshtar i madh i Luftës në Irak, dhe kishte votuar kundër kampanjës së atëhershme të laburistëve për të intervenuar atje.

Lufta e nisur nga Amerika, me përkrahjen e madhe të Britanisë së Madhe, kishte shkaktuar rreth 600,000 vdekje të irakianëve për 4 vjet.