Togeri i FSK-së, Leotrim Mziu nderohet me çmimin ‘Honor Graduate’ në ShBA

Togeri Leotrim Mziu ka përfunduar me rezultate të larta Kursin Bazik për Oficer të Këmbësorisë (IBOLC) në Fort Benning, Georgia, Shtetet e Bashkuara të Amerikës. Ai është shpërblyer me çmimin International Honor Graduate, një nderim prestigjioz që njihet për arritjet e shkëlqyera akademike dhe performancën gjatë trajnimit.

Gjatë 19 javëve të këtij kursi intensiv, Toger Mziu ka demonstruar një performancë të lartë dhe një përkushtim të veçantë, duke përfaqësuar denjësisht Forcën e Sigurisë së Kosovës. Në mesin e 170 pjesëmarrësve të kursit, që përfshinte oficerë amerikanë dhe nga vende të ndryshme të botës, Toger Mziu ka spikatur për aftësitë e tij të shkëlqyera në udhëheqje dhe profesionalizëm.

IBOLC është një nga kurset më të vështira dhe kërkon aftësi të larta fizike dhe mendore. Përgjatë këtij kursi, pjesëmarrësit trajnohen në taktika të avancuara të këmbësorisë, udhëheqje në fushëbetejë, si dhe në zhvillimin e aftësive të tyre si liderë të ardhshëm ushtarakë. Toger Mziu ka arritur të përfundojë këtë trajnim me sukses të jashtëzakonshëm, duke marrë një vlerësim të lartë nga instruktorët dhe bashkëkursantët e tij.

Kjo arritje e Toger Mziut është një dëshmi e përkushtimit dhe profesionalizmit të tij, dhe një shembull i shkëlqyer për kolegët e tij në Forcën e Sigurisë së Kosovës. Ky sukses gjithashtu tregon për përkushtimin dhe standardet e larta të trajnimit dhe përgatitjes së oficerëve kosovarë në skenën ndërkombëtare.

Ardhja e tij me një çmim kaq të lartë është një arritje e madhe jo vetëm për të personalisht, por edhe për Forcën e Sigurisë së Kosovës dhe për vendin. Kjo do të shërbejë si një nxitje për oficerët e tjerë të ndjekin shembullin e tij dhe të përpiqen për të arritur standarde të larta në karrierën e tyre ushtarake./Telegrafi/