“Ti nuk je kapiteni i duhur”, David De Gea ka reaguar pas golit të Bruno Fernandes në minutat e fundit ndaj Fulhamit

David de Gea ka komentuar me ironi se Bruno Fernandes nuk duhet të jetë kapiteni i Manchester United pas golit të mesfushorit portugez që i dha tri pikë të rëndësishme klubit në udhëtim ndaj Fulhamit.

Kapiteni i United, Fernandes ka marrë një sërë kritikash, duke filluar që nga ish-legjenda e klubit Roy Keane, i cili pretendoi se portugezit duhet t’i hiqet shiriti i kapitenit.

Sidoqoftë, Fernandes iu përgjigj kritikëve të tij me një gol të shënuar në minutat e fundit të ndeshjes në “Craven Cottage” teksa United fitoi në fund me rezultat minimal 1-0.

Pas ndeshjes, Fernandes bëri një postim në Instagram dhe ish-portieri i United, De Gea, i cili është lidhur së fundmi me një rikthim në klub, tregoi mbështetjen për ish-bashkëlojtarin e tij.

Spanjolli bëri një koment me sarkazëm duke thënë: ‘Ti nuk je kapiteni i duhur’. Komenti i De Geas ishte me sa duket në lidhje me pikëpamjen e Keane se Fernandes nuk duhet të jetë kapiten i skuadrës.

Ish-kapiteni i United Keane e bëri këtë pretendim pas humbjes me rezultat 3-0 të United nga rivalët e qytetit Manchester City fundjavën e kaluar.

Lexo po ashtu Man United të gatshëm të ofrojnë kartonin e Antony për shërbimet e sulmuesit të Flamengos

Kujtojmë se Bruno u bë kapiten i “Djajve të Kuq” pas emërimit në stol të trajnerit Ten Hag, teksa deri në atë kohë shiritin e mbante Harry Maguire./Telegrafi/