Thyen masën arrest shtëpie, 33-vjeçari ndiqet nga policia dhe kapet në Qeparo me automjetin e mbushur me kanabis

Policia e Himarës ka njoftuar sot arrestimin në flagrancë të shtetasit E. P., 33 vjeç pasi u zbulua se kishte thyer masën e sigurisë “Arrest në shtëpi”, për veprën penale “Plagosja e rëndë me dashje”, për të transportuar lëndën narkotike.

Operacioni u zhvillua nga Komisariati i Policisë Himarë, në bashkëpunim me shërbimet e Qarkullimit Rrugor të Policisë së Vlorës.

Gjatë operacionit, në fshatin Qeparo, u bë e mundur kapja në flagrancë e shtetasit E. P., 33 vjeç, banues në Sarandë. Ky shtetas ka tentuar të largohet për të shmangur kontrollin e automjeti nga shërbimet e Policisë, por falë ndërhyrjes së menjëhershme nga ana e tyre, ai është kapur dhe vënë në pranga.

Nga verifikimet e kryera ka rezultuar se ky shtetas kishte thyer masën e sigurisë “Arrest në shtëpi”, për veprën penale “Plagosja e rëndë me dashje”.

Gjatë kontrollit të ushtruar në automjetin që drejtonte ky shtetas, u gjetën 9 kilogramë lëndë e dyshuar narkotike kanabis, të cilat u sekuestruan në cilësinë e provës materiale, bashkë me 2 aparate celulare.

Nga veprimet hetimore dyshohet se lënda narkotike do të shitej me qëllim trafikimin drejt Greqisë.

Vijojnë veprimet hetimore për dokumentimin e plotë të kësaj veprimtarie kriminale, si dhe për identifikimin dhe vënien përpara përgjegjësisë ligjore, të shtetasve të tjerë që mund të jenë përfshirë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të metejshme. /Telegrafi/