Thaçi: Institucionet e sigurisë të parandalojnë incidentet nëpër manifestimet e të gjitha komuniteteve

Presidenti i vendit, Hashim Thaçi tha sot se Kosova ka shënuar progres të dukshëm në ndërtimin e raporteve të mira ndëretnike në mes të të gjitha komuniteteve në Kosovë.

Thaçi në një postim në rrjetin social Facebook shkruan se bashkëjetesa dhe toleranca kanë qenë, janë dhe do të mbesin virtyte të shoqërisë sonë, por sipas tij, janë shqetësuese edhe ato pak incidente ndëretnike që janë shënuar në ditët e fundit.

Lexoni të plotë postimin e Thaçit në Facebook:

“Kosova ka shënuar progres të dukshëm në ndërtimin e raporteve të mira ndëretnike në mes të të gjitha komuniteteve që jetojnë në vendin tonë. Bashkëjetesa dhe toleranca kanë qenë, janë dhe do të mbesin virtyte të shoqërisë sonë. Por, janë shqetësuese edhe ato pak incidente ndëretnike që janë shënuar në ditët e fundit. Këtyre sjelljeve duhet t’ua ndalim rrugën menjëherë dhe të mos lejojmë që të bëhen të pranueshme në shoqërinë tonë. Në muajin qershor, të gjitha komunitetet e Kosovës kremtojnë ditë dhe data të shënuara. Këto duhet të respektohen nga të gjithë dhe të dënohet çdo cenim apo përpjekje për të penguar shënimin e tyre. Nga institucionet e rendit dhe sigurisë, kërkoj që të kenë kujdes të shtuar në marrjen e të gjitha masave për parandalimin e çfarëdo incidenti të mundshëm gjatë këtyre manifestimeve”.