Tetovë, do të largohen garazhet dhe kioskat ilegale

Komuna e Tetovës nëpërmjet inspektoratit komunal do të largojë të gjithë garazhet dhe kioskat të vendosura në vende publike. Sipas udhëheqësit të inspektoratit komunal për ndërtimtari Abdylgani Aliji qëllimi është që të lirohen hapësirat publike. Ai tha se qytetarët kanë afat 7 ditë që ato t’i largojnë vet.

“Inspektorati ndërtimor ka filluar me njoftimin e qytetarëve që kanë të vendosura garazhe apo kioska pa leje në afat prej shtatë ditësh të fillojnë t’i mënjanojnë , në të kundërtën inspektorati komunal do të fillojë me largimin e tyre, që nuk posedojnë asnjë lloj dokumentacioni, ndërsa qytetarët që i kanë vendosur pa leje harxhimet do i mbartin vetë”, tha Abdylgani Aliji – inspektorati komunal.

Qytetarët që anketuam afër këtyre garazheve thonë se çdo ndërtesë do të duhet që të ketë vend parkim, ndërsa shprehen PRO largimit të garazheve pa leje.

“Pa leje, komuna duhet të gjitha t’i largojë”

“Të gjithë ndërtesat, çdo banesë duhet të ketë garazhe, si mund unë banojë këtu a veturën ta lë atje në Përxhena Bafçe, unë këtu jetojë.”

Në shumicën e rasteve edhe pse qytetarët kanë garazhe, përsëri veturat i parkojnë jashtë ndërsa të njëjta i shfrytëzojnë si vend për mbajtjen e mjeteve të punës. Në bazë të të dhënave jo zyrtare, me heqjen e këtyre garazheve do të lirohen diku mbi 3200 vendparkime.