Tërheqja e njohjeve, pasojë e dialogut të gabuar

Serbia ka prezantuar një dokument që thotë se Sierra Leone është shteti i radhës që e ka tërhequr njohjen e Pavarësisë së Kosovës. Ndërkaq, njohës të fushës, thonë se devijimi i dialogut, po e ndihmon agresivitetin diplomatik serb.

Sierra Leone është shteti i radhës që e ka tërhequr njohjen e Pavarësisë së Kosovës. Këtë e thotë ministri i jashtëm serb, Ivica Daçiq, duke e prezantuar një dokument, si notë verbale që e konfirmon këtë.

Në këtë dokument, që prezantoi diplomacia serbe, thuhet se “e mbështet vendimin e këtij vendi për çnjohje të pavarësisë së Kosovës, në vazhdim të dialogut ndërmjet Serbisë dhe Kosovës “për çështjen e pavarësisë së Kosovës”.

Megjithatë, asgjë zyrtare nuk ka arritur në adresë të Ministrisë së Punëve të Jashtme të Kosovës.

Demush Shasha nga Instituti Epik, thotë se devijimi i dialogut, po e favorizon edhe fushatën e çnjohjeve

“Kjo dukuri e çnjohjeve është parë edhe gjatë vitit 2019, ndërsa po vazhdon edhe tani. Ajo është pasojë e një rruge të gabuar që ka marrë dialogu. Pra nga një diskutim për çështje teknike për normalizim të marrëdhënieve, dialogu po prodhon efekte anësore siç janë çnjohjet e Republikës së Kosovës”, deklaroi për RTV Dukagjinin, Demush Shasha.

Ndërkaq, Visar Xhambazi flet për mos-përfilljen që Serbia po i bënë thirrjes së ndërkombëtarëve.

“Vitin e kaluar shtetet e QUINT-it dolën me një deklaratë eksplicite ku i kërkohej Kosovës të hiqte tarifën , ndërsa Serbisë i kërkohet të ndalohet fushata agresive për çnjohjen e Kosovës”, deklaroi Visar Xhambazi.

Lajmi për Sierra Leonen, vjen pas skandalit diplomatik, ku fillimisht u prezantua njohja nga Xhamajka e më pas, doli të ishte lajm i rrem.

Ndërkaq, sipas ministrit serb, Daçiq, Kosovën e njohin vetëm 92 shtete të OKB-së, nga gjithsej 193 shtete. /RTV Dukagjini/Telegrafi/