TEB organizoi “Akademinë e Biznesit VI”

Banka TEB solli Akademinë e Biznesit VI në Prishtinë. Pjesëmarrës të shumtë nga biznese të ndryshme morën pjesë në punëtoritë e organizuara sot.

Ofrimi i shërbimeve jo-financiare që iu nevojiten bizneseve, tashmë është bërë një traditë e TEB Bankës me qëllim që të kontribuojë në zhvillimin ekonomik të Kosovës.

Përgjatë punëtorive të organizuara sot, nga ekspertë dhe profesor të Turqisë të sjellë nga “Girshim”, u prekën tema të ndjeshme për bizneset e vogla dhe të mesme me theks të veçantë menaxhimi i Ndërmarrjeve të Vogla dhe të Mesme të ditëve të sotme për të ardhmen.

Mehmet Sanli, themelues i firmës konsulente për ndërmarrësi dhe biznes tha se një firmë kur themelohet është ndërmarrje e vogël dhe e mesme, por asaj i takon të punojë dhe të ketë pretendime drejt rritjes.

Në punëtori u theksua se detyra e parë e vështirë e NVM-së është të merr vendime afatgjatë dhe këto t’i sistemojë në një formë strategjike.

Sanli tha për KosovaPress se në lidhje me NVM-të në Kosovë, fillimisht janë bërë studime dhe hulumtime me ç’rast vërehet një nevojë e madhe për rritje të eksportit.

“Para se të vijmë në Kosovë bëjmë studime qoftë për ekonominë e përgjithshme qoftë për cilësinë e bizneseve që operojnë në këto vende. Natyrisht prej çështjeve tona të cilat i hulumtojmë janë nevojat e firmave për rritje, andaj edhe trajnimet tona i dizajnojmë në përputhje me këto kërkesa. Nevoja të cilën e identifikuam ne te këto biznese është zvogëlimi I importit dhe rritja e eksportit. Ose nevojitet rritja e shpejtë e ndërmarrjeve aktuale. Sa i përket rritjes kemi të bëjmë me dy elemente, planifikimin e rritjes duke e parë si çështje strategjike gjithashtu japim edhe trajnim edhe për skenarë të rritjes në përputhje me sektorin në të cilin ata shërbejnë. Duhet ta theksojmë edhe faktin se ne kemi shërbyer si konsulentë edhe për TEB-in si dhe kemi ofruar këshilla për rritjen e bizneseve të cilat janë klientë të TEB-it”, tha ai.

Meqenëse është viti i tretë që mbahen trajnime dhe ipen këshilla për bizneset në Kosovë Sanli i pyetur nëse NVM-të po shënojnë rritje u shpreh se ndryshimet pozitive shihen pas ndryshimeve të mënyrës së punës, gjë që zakonisht vërehet pas një apo dy viteve.

“Një NVM e cila e planifikon rritjen dhe e zbaton atë nuk ndryshon gjendja e saj menjëherë të nesërmen, por ajo që ndryshon është mënyra e punës së saj. Përveç analizimit dhe shikimit të çështjeve ditore, firmat fillojnë të interesohen edhe për punë të cilat janë edhe mujore, tremujore, gjashtëmujore dhe vjetore. Pra në mendjen vendoset mendimi për rritje, andaj pas një viti apo dy viteve fillojnë ndryshimet positive në kuadër të biznesit… firmat duhet t’i themelojnë akademitë në kuadër të biznesit të tyre dhe në këtë mënyrë ta përshpejtojnë trajnimin e personelit”, u shpreh ai.

Sipas studimeve, rritja e ndërmarrjeve të vogla është problem global pasi që shumica e tyre frikësohen të zgjerohen shkaku i humbjes. /Telegrafi/