Të verbërit në Kërçovë janë lënë në harresë!

Se është dyfish vështirësi të jesh i verbër në Maqedoni, e dëshmon gjendja e kësaj kategorie qytetarësh në Kërçovë.

Shoqata në këtë qytet numëron rreth 170 anëtarë, por nuk kanë as zyra ku të kryejnë aktivitete dhe as kushte për të ecur nëpër rrugë.

Nënkryetari i Shoqatës së të verbërve në Maqedoni thotë janë lënë krejtësisht në harresë.

“Shoqata jonë nuk ka aspak kushte nuk kemi zyra, komuna na ka harruar për çdo gjë, as mjete financiare! Kohë më parë na jepte disa gjëra tash edhe ata nuk i jep, kërkojmë nga komuna të na ndihmojë të mos na lëre në harresë”, tha Zejno Bajrami, nënkryetar i Shoqatës së të Verbërve në RMV.

Edhe koordinatori i Shoqatës së të verbërve në Kërçovë e pohon të njëjtën gjë.

“Kushtet janë shumë të dobëta për shkak se vitet e fundit kemi mbet edhe pa zyrë për edukim për këta persona shpesh herë kemi tentuar te kryetari i komunës dhe çdo vit na thonë se do të bëhet do të bëhet, shpresojmë se këtë vit do të na sigurojnë zyra”, tha Zenel Zylbeari, kordinaror i Shoqatës së të Verbërve.

Shoqata e të verbërve në Kërçovë disa vite me radhë ka funksionuar në një barakë me kushte të këqija. Më pas e njëjta u prish nga ana e Komunës dhe tash kanë mbetur pa zyra për trajnim dhe ndërveprim.