Të shtëna me armë në ahengje familjare – policia intervenon në dy raste

Policia e Kosovës njofton se mbrëmë njësitet policore në Skenderaj  dhe në Vushtrri kanë reaguar në dy lokacione ku kishte informacione për të shtëna me armë në ahengje.

Informacione për të shtëna ishin raportuar në fshatin Runik të Skenderajt dhe në fshatin Nadakovc të Vushtrrisë.

“Si rezultat i reagimit të shpejtë të njësive policore ka rezultuar që në dy lokacionet të konfiskohen dy  armë të llojit pistoleta, tetë fishekë dhe katër gëzhoja, të cilat dyshohet se janë përdorur në ahengje familjare”, thuhet në njoftimin për media.

Në cilësi të të dyshuarve janë arrestuar dy persona, ndërsa pas procedurave intervistuese të njëjtit me urdhër të prokurorit, janë liruar për procedurë të rregullt.

Ndaj tyre janë iniciuar raste për veprën penale ‘përdorim i armës’ dhe ‘mbajtje në pronësi, kontroll të paautorizuar të armës’.

“Policia apelon te qytetarët që të shmangin veprimet e tilla, ku përdorimi i armëve në ahengje është i sanksionuar me ligj. Policia do të ndërmarrë të gjitha veprimet sipas autorizimeve, përfshirë  dhe bastisjen e lokacioneve ku dyshohet se janë përdorur armët”, thuhet tutje në njoftim. /Telegrafi/