Të nxehtit ekstrem, shkaktar i vdekjes së 400 personave në Holandë

Pothuajse 400 persona më shumë kanë vdekur në Holandë gjatë valës së të nxehtit rekord të Evropës sesa në një javë të zakonshme vere, thuhet në raportin e agjencisë holandeze të statistikave CBS, shkruan Reuters.

“Në total, 2964 persona kanë vdekur në Holandë gjatë javës që filloi më 22 korrik”, thuhet ndër tjera në raportin e CBS, që i bie rreth 15 për qind më shumë sesa që ndodh në një javë gjatë verës, transmeton Telegrafi.

Temperaturat e regjistruara nëpër Evropë gjatë javës së fundit të korrikut ishin 40 gradë celsius, kurse numri i të vdekurve në Holandë gjatë asaj jave ishte i krahasueshëm me normën e dy valëve të nxehtit të viti 2006, që konsiderohen si më të gjata në këtë vend.

Rreth 300 viktima shtesë ishin midis personave të moshës 80-vjeç dhe më të vjetër. Shumica e vdekjeve kanë ndodhur në lindje të Holandës, ku temperaturat ishin më të larta dhe vala e të nxehtit zgjati më shumë sesa në pjesët tjera të vendit.

Holanda ka një popullsi prej 17 milionë banorë, kurse kjo ishte vala e dytë e të nxehtit ekstrem që ka goditur këtë muaj Evropën, e ekspertët e ndryshimeve klimatike paralajmërojnë se kjo nxehtësi mund të bëhet edhe më e zakonshme, për shkak të sasisë të madhe të emetimit të gazrave. /Telegrafi/