TË KALUARAT TUA TË MUNDSHME

Nga: Roger Waters (Pink Floyd, kënga Your Possible Pasts nga albumi The Final Cut, 1983)
Përktheu: Agron Shala

Prapa shpine t’i fërfëllojnë të kaluarat tua të mundshme
Disa naive dhe plot gjallëri, disa të frikshme dhe të dëmshme
Një paralajmërim për secilin që ende mban situatën nën kontroll
“Rreshtohuni! Sulm”
Që të kenë kujdes për të kaluarat e tyre të mundshme
Në binarët e braktisur të hekurudhave, kurthohen lulëkuqet
Ndërsa vagonët me viktima presin shansin tjetër

A më mban mend? Si ishim dikur?
A mendon se kemi mundur të jemi më të afërt?

Me një buzëqeshje të venitur, ajo qëndroi në prag të derës
Me fytyrën që flakëronte si neoni i një hoteli të lirë
Vështrimi i saj i akullt përgjëroi burrat e dyshimtë
Për bekimin apo gjykimin e tyre
Me një hap të guximshëm para, njëri dorën zgjat
Ai tha: “Dikur isha fëmijë, e tash jam veç një burrë”

A më mban mend? Si ishim dikur?
A mendon se kemi mundur të jemi më të afërt?

U nënshtruam nga shpërfillja dhe fetarët
Na treguan si të ndihemi mirë dhe na mësuam si të ndihemi keq
Me gojën mbyllur dhe të tmerruar mësuam si të luteshim
Ndjenjat tona u përmbysën dhe mbetën pa frymë
Prapa nesh i varën pankartat dhe flamujt
Të së kaluarës sonë të mundshme që shtrihet në lecka të shqyera

A më mban mend? Si ishim dikur?
A mendon se kemi mundur të jemi më të afërt?