Tahiri, Qeverisë: Trustit i thatë jo, me vetëdije po e dërgoni vendin në kolaps energjetik

Shefi i Grupit Parlamentar të Aleancës për Ardhmërinë e Kosovës, Besnik Tahiri, ka reaguar pasi deputetët e Komisionit për Buxhet dhe Transfere nuk e kanë miratuar ndryshimin në parim të Ligjit për tërheqjen e kursimeve nga Fondi Pensional (Trusti).

Me anë të një shkrimi në Facebook drejtuar Qeverisë Kurti, Tahiri ka thënë se me vendime anti-ligjore vetëdijshëm po e dërgojnë vendin në kolaps energjetik.

“Trustit i thatë jo, me vetëdije po e dërgoni vendin në kolaps energjetik me vendime anti-ligjore”, ka shkruar shefi i deputetëve të AAK-së.

Lexo po ashtu Projektligji për tërheqjen e kursimeve nga Trusti shkon në Kuvend pa miratimin e Komisionit për Buxhet

Ai tutje ka përmendur edhe Ligjin e Pagave i cili ende nuk është dërguar në Kuvend për miratim, duke thënë se është pluhurosur në sirtarët e zyrave të ministrave.

“Qe besa 100 euro ende nuk i dhatë për punëtorët e sektorit privat. Qeveri kah jeni nis? Kthjelluni!”, ka përfunduar Tahiri në statusin e tij.

Pasi ndryshimi në parim i Ligjit për tërheqjen e kursimeve nga Fondi Pensional (Trusti) nuk u miratua nga deputetët e Komisionit për Buxhet dhe Transfere, ky Projektligj do të shqyrtohet në Kuvendin e Kosovës pa miratimin e këtij komisioni apo Qeverisë.

Deputeti nga Partia Demokratike e Kosovës (PDK), Bekim Haxhiu në një prononcim për Telegrafin tha se beson që deputetët do të dëgjojnë zërin e qytetarëve për të votuar tërheqjen e kursimeve nga Trusti.

“Votat janë të deputetëve, besoj se do të dëgjojnë zërin e qytetarëve për të votuar Trustin në Kuvend”, ka thënë Haxhiu./Telegrafi/