Ekonomi Të Tjera

Suspendohet drejtori i ATK-së, Ilir Murtezaj – tri ditë pas rikthimit në punë [Dokument]

Para 4 vitesh

Tri ditë pasi u rikthye nga shkarkimi si drejtor i përgjithshëm i Administratës Tatimore të Kosovës, Ilir Murtezaj është suspenduar sërish nga kjo pozitë.

Në një përgjigje për Telegrafin, Ministria e Financave tregon se Këshilli Shtetëror për Vlerësim dhe Disiplinë ka marrë vendim që Murtezaj të pezullohet nga detyra e drejtorit të përgjithshëm.

“Këshilli Shtetëror për Vlerësim dhe Disiplinë, me Vendimin 0007/2021, të datës 11/01/2021, pas shqyrtimit të kërkesës së datës 31/12/2020 me Nr. Prot. 2367 për inicimin e procedurës disiplinore kundër zt. Ilir Murtezaj, drejtor i përgjithshëm i Administratës Tatimore të Kosovës, ka marrë vendim që zt. Ilir Murtezaj të pezullohet nga detyra e drejtorit të përgjithshëm të Administratës Tatimore të Kosovës deri në një vendim tjetër”, thuhet në përgjigjen e MF-së.

Më muajin tetor 2020, kryeministri në detyrë, Avdullah Hoti kishte shkarkuar Murtezajn nga kjo pozitë.

“Në përputhje me kompetencat ligjore dhe bazuar në rekomandimet e Ministres së Financave, kryeministri Avdullah Hoti, ka marrë vendim për t’i liruar nga detyra ushtruesin e detyrës së Drejtorit të Përgjithshëm të Doganës të Kosovës dhe Drejtorin e Përgjithshëm të Administratës Tatimore të Kosovës”, thuhej në njoftimin e Qeverisë.

Ish-drejtori i ATK-së, Ilir Murtezaj i cili ishte shkarkuar, kishte theksuar se vendimi për shkarkimin e tij kishte ndikim nga politika, dhe kishe kryeministrin dhe Qeverinë për punësime familjare, favorizim të bizneseve edhe nepotizëm në këtë agjenci.

“Pikërisht ky kryeministër ka qenë në pozitën e ministrit të Financave kur është lejuar skajshmërisht të abuzohet me detyrën zyrtare. Të pranohen njerëz të fëmijëve me ndikim në politikë, me ndikim në gjyqësor, me ndikim në Prokurorinë e Shtetit. A është ndryshe kapja e shtetit? Absolut nuk është. Tash këto raste që i potencova që i kemi proceduar në organet e drejtësisë, fatkeqësisht nuk po ngritën aktakuzë ndaj tyre. Pse? Sepse e kanë marrë fëmijët e prokurorëve në punë, ato janë të njohura edhe për opinionin, i kanë marrë fëmijët e gjyqtarëve, i kanë marrë fëmijët e deputetëve ose renë e deputetit. Pse? Për të bërë krimin e organizuar, dhe për të mbyllur gojët e të gjithëve. Kryeministri i vendin e dinë familjarët e tij që i ka punësuar në Ministrinë e Financave, pastaj të dërguar në Auditorin e Përgjithshëm”, kishte thënë Murtezaj.

Pas këtij vendimi, ai ishte kthyer në punën më 8 janar 2021, mirëpo në ditën e dytë të punës pas rimarrjes së detyrës i njëjti u suspendua.

Këshilli i Pavarur Mbikëqyrës për Shërbimin Civil të Kosovës i kishte dhënë të drejtë ish-drejtorit të ATK-së, në ankesën e këtij të fundit pas shkarkimit nga pozita që e mbante në Administratën Tatimore. /Telegrafi/