Sulmohet drejtori i Bujqësisë në Skenderaj, Jashari thotë se subvencionet e bujqësisë fitohen vetëm në mënyrën meritore

Kryetari i komunës së Skenderajt, Bekim Jashari ka njoftuar se sot gjatë ditës është sulmuar drejtori i Bujqësisë, Pylltarisë dhe Zhvillimit Rural, Sokol Sallahu.

Jashari ka thënë se Sallahu është një nga ekspertët e rrallë, i cili ka arritur të zhvillojë shumë projekte në fushën e bujqësisë, dhe të menaxhojë me sukses këtë sektor shumë të rëndësishëm të zhvillimit të vendit.

Në reagimin e bërë, ai ka theksuar se projektet, subvencionet dhe mbështetja për zhvillimin e bujqësisë fitohen në mënyrë meritore dhe jo me nepotizëm. Ai ka përmendur edhe kushëririn e tij, Behram Jasharin, duke ia kujtuar rregullat dhe ligjet e shtetit, dhe se nuk duhet sulmuar të tjerët për interesa personale, transmeton Telegrafi.

Jashari zotohet se nën udhëheqjen e tij, Komuna e Skenderajt nuk do të jetë e një familje apo grupi të caktuar por e të gjithë qytetarëve pa dallim.

Reagimi i plotë i Bekim Jasharit:

“Të nderuar qytetarë,

Sot në vendin e tij të punës është sulmuar drejtori i Bujqësisë, Pylltarisë dhe Zhvillimit Rural, Sokol Sallahu, një nga ekspertët e rrallë të kësaj fushe, i vlerësuar jo vetëm nga ne, por edhe nga asociacionet dhe organizatat ndërkombëtare, i cili gjithashtu i përzgjedhur nga Agjencioni Japonez për Ndërtim, për të përfaqësuar Kosovën në Japoni, pa përmendur këtu edhe vlerësime të tjera të rëndësishme për profesionalizmin e tij.

Qeveria të cilën unë e udhëheq vlerëson lartë punën e drejtorit Sokol Sallahu, i cili ka arritur të zhvillojë shumë projekte në fushën e bujqësisë dhe të menaxhojë me sukses këtë sektor shumë të rëndësishëm të zhvillimit të vendit.

Projektet, subvencionet, mbështetja për zhvillimin e bujqësisë përfshirë sektorët e saj, fitohen vetëm në mënyrën meritore, profesionale, pa njoftësi, interferime e kërcënime, qofshin ata edhe kusherinjë te gjakut tim.

I bëj me dije Behram Jasharit dhe të tjerëve si ai, se duhet të mësohen t’i respektojnë rregullat dhe ligjet e shtetit tonë dhe të respektojnë të tjerët, sepse ata që u flijuan për këtë vend, anë e kënd Kosovës, ranë që ky vend të jetë i lirë dhe i zhvilluar, dhe asessi që ne pasuesit e tyre t’i kërcënojmë dhe sulmojmë të tjerët për interesa personale.

Komuna e Skenderajt, nën udhëheqjen time, nuk do të jetë e Jasharajve, Mehajve, Lushtakve, Geceve, etj, nuk do të jetë e një familjeje apo grupi të caktuar, por do të jetë e të gjithë qytetarëve pa dallim.

Ftoj organet e drejtësisë që në mënyrë të pavarur të merren me rastin dhe sulmuesin e drejtorit ta vënë para organeve të drejtësisë”, ka shkruar Jashari në Facebook./Telegrafi/