Suedia dhe Finlanda reagojnë pasi Erdogan tha se mund të vendos veto për anëtarësimin e vendeve nordike në NATO

Pasi Rusia pushtoi Ukrainën, Finlanda dhe Suedia vendosën t’i bashkohen aleancës më të madhe ushtarake në botë, me të cilën kanë bashkëpunuar për një kohë të gjatë.

Askush nuk priste që pranimi i tyre në NATO do të ishte problem derisa presidenti turk, Recep Tayyip Erdogan deklaroi se mund ta shfrytëzojë të drejtën e vetos dhe bllokojë anëtarësimin e tyre në NATO, pasi këto dy shtete përkrahin terroristët kurd si dhe nuk ekstradojnë “gylenistët” në Turqi.

Kjo ka bërë që të reagojë ministrat e Jashtëm suedez dhe finlandez pas zhvillimeve të reja, duke thënë se shpresojnë të takohen me homologun e tyre turk në Berlin, në një takim jozyrtar të ministrave të jashtëm të NATO-s.

“Ne do të kemi mundësi të diskutojmë rreth aplikimit të mundshëm në NATO”, tha Ministrja e Jashtme suedeze, Ann Linde për AFP, duke vënë në dukje gjithashtu se “qeveria turke nuk e ka dhënë drejtpërdrejt këtë lloj mesazhi”.

Duke folur në një konferencë shtypi në Helsinki, ministri i Jashtëm finlandez, Pekka Haavisto beson se do të takohet me ministrin e Jashtëm turk, Mevlut Cavusoglu gjatë fundjavës për të “vazhduar debatin brenda vendit”.

Lexo po ashtu Erdogan mund të shfrytëzojë veton kundër hyrjes së Suedisë dhe Finlandës në NATO

Reagimi i Turqisë nuk është mosmarrëveshja e parë kundër perspektivës së Finlandës dhe Suedisë për anëtarësim në NATO.

E njëjta gjë u njoftua më parë edhe nga presidenti kroat, Zoran Milanoviq, duke e kushtëzuar hyrjen e tyre me arritjen e një marrëveshjeje mbi ligjin zgjedhor në Bosnje-Hercegovinë.

Megjithatë, njoftimi i të parit të shtetit kroat nuk po merret seriozisht në komunitetin ndërkombëtar, duke qenë se ai nuk ka fuqi të ndalojë hyrjen e shteteve në Aleancë. Një retorikë e tillë ka dëmtuar marrëdhëniet e Kroacisë me dy aspirantë të NATO-s. /Telegrafi/