Sot u shënua dita e Komunës së Gostivarit, të pranishëm politikanë të ndryshëm

Komuna e Gostivarit, në Qendrën për Kulturë organizoi akademinë solemne me rastin e Ditës së Komunës, 29 Qershorit.

Në prani të funksionarëve të lartë shtetëror, deputetë, përfaqësues të jetës fetare, kryetarë komunash, përfaqësues të Komunave Stari Grad të Bosnjës dhe Hercegovinës dhe Smolen të Bullgarisë, kryetari i Komunës së Gostivarit, Nevzat Bejta, foli mbi rëndësinë e Ditës së Komunës së Gostivarit.

Ai tha se 29 Qershori paraqet Ditën e Komunës së Gostivarit. Kjo datë sipas tij, për qytetarët e Gostivarit ka një domethënie të madhe historike, pasi më 29 qershor të vitit 1992 pas shkatërrimit të sistemit komunist, qytetarët e Gostivarit për herë të parë patën rastin që me votën e tyre demokratike të zgjedhin kryetarin e Komunës dhe përfaqësuesit e institucioneve të tjera lokale.

Nga skena e Qendrës për Kulturë në Gostivar, Qytetar Nderi i Qytetit të Gostivarit për vitin 2017, Bejta shpalli, Milaim Fejziun, i cili ishte kryetar i parë i Senatit të Universitetit të Tetovës.

I pranishëm në këtë eveniment ishte kryetari i Parlamentit të Republikës së Maqedonisë, Talat Xhaferi, i cili në fjalimin e tij potencoi që Komuna e Gostivarit është një nga Komunat e para e cila ka zbatuar praktika më të mira në të mirën e qytetarëve, duke ndjekur shembujt e mira të komunave evropiane.

Fjalë rasti mbajtën edhe përfaqësuesit e Komunave Stari Grad dhe Smolen, Sanel Dragolovçan dhe Ivan Todorov Pejkov, të cilët shprehen fjalë miradie për punët e realizuara nga Komuna e Gostivarit dhe në emër të kryetarëve të Komunave, Ibrahim Haxhibajriç dhe Nikolaj Melemov falënderuan kryetarin e Komunës së Gostivarit, Bejta për ftesën e bërë për të qenë të pranishëm në festën e Ditës së Komunës./Telegrafi/