Situata në Mitrovicë e qetë, sot në mesditë do të ketë një protestë nga serbët

Situata në Mitrovicë, pas aksionit të Policisë së Kosovës është e qetë, shkruan agjencia serbe e lajmeve Tanjug, përcjell Telegrafi.

Siç bën të ditur ky medium, sot, një ditë pas aksionit të Policisë, një tubim protestues nga serbët do të mbahet në sheshin kryesor në Mitrovicën e Veriut në mesditë.

Ndryshe, gjatë një operacioni të Policisë së Kosovës në veri të Mitrovicës ditën e martë, janë arrestuar disa zyrtarë policorë, si dhe disa qytetarë.

Përveç kësaj, është raportuar se ka edhe policë të plagosur, gjendja e të cilëve është jashtë rrezikut për jetë.

Policia e Kosovës ndërkohë ka njoftuar se operacionit policor i ka paraprirë një hetim disamujor i IPK-së dhe PK-së i udhëhequr nga Prokuroria Speciale e Kosovës, i cili ka rezultuar me dyshimin e bazuar të përfshirjes së disa zyrtarëve policorë dhe të disa qytetarëve në veprimtari kriminale ‘pjesëmarrje ose organizim i grupit kriminal’ dhe vepra tjera të specifikuara.

Po ashtu gjatë operacionit, siç është bërë e ditur, Policia ka konfiskuar gjësende të ndryshme përfshirë edhe disa armë. /Telegrafi/