Shpërthim dhe zjarr në një termocentral në Japoni, ekipe të shumta të zjarrfikësve dalin në terren

Një zjarr shpërtheu sot në termocentralin Taketoyo në prefekturën Aichi në pjesë qendrore të Japonisë, njoftoi pronari i tij JERA, duke shtuar se operacionet në termocentral janë pezulluar.

Transmetuesi publik NHK raportoi më herët se u dëgjua një shpërthim dhe dëshmitarët panë tym të zi që ngrihej nga termocentrali, transmeton Telegrafi.

Nga dhoma e kaldajave të termocentralit dilte tym i zi dhe pranë tij digjej një transportues qymyri, raportoi NHK.

Zjarrfikësit u dërguan në vendngjarje pasi morën thirrje nga dëshmitarët, tha një zyrtar lokal i zjarrfikësve për Reuters.

Termocentrali drejtohet nga JERA, një kompani lidere japoneze e shërbimeve. JERA njoftoi se rreth orës 15:14, tym dhe zjarr u zbuluan në shiritin transportues që transporton karburantin në fabrikë.

Puna në objekt u ndërpre shpejt, tha JERA, duke shtuar se nuk kishte të lënduar. Kapaciteti gjenerues i termocentralit Taketoyo është 1,070 MW, i cili është ndër më të mëdhenjtë në Japoni për sa i përket një njësie të vetme gjeneruese, sipas ueb-faqes së JERA.

Termocentrali ndodhet rreth 40 kilometra në jug të Nagoya, qyteti më i madh në pjesë qendrore të Japonisë. /Telegrafi/

https://www.youtube.com/watch?v=esOiHNgfSRI&ab_channel=GFS