Shpërthen LeBron, i pakënaqur me ekipin: Dua organizator, mos ma humbni kohën

LeBron James ka shpërthyer keq pas disfatës së Cleveland Cavaliers nga New Orleans Pelicans të hënën mbrëma.

Humbja nga New Orleans ishte e pesta në shtatë ndeshjet e fundit për kampionët aktual të NBA.

E çuditshme ishte se si erdhi humbja pasi James regjistroi triple double dhe Kyrie Irving shënoi 49 pikë në këtë duel, e megjithatë pësuan humbje nga New Orleans që kishte mungesën e Anthony Davis.

I frustruar pas humbjes, LeBron shprehu pakënaqësinë me drejtuesit e klubit në një sesioni me gazetarë që zgjati rreth 20 minuta.

“Nuk kam kohë për të humbur. Unë do të jem 33 vjeç dimrin tjetër dhe nuk kam kohë për të humbur. Kjo është ajo që po them”.

“Kur do të ndihem fizikisht apo mentalisht, unë personalisht, i pa aftë që të luftoj për titull, e do të ndjej se nuk mund ta bëj këtë, atëherë nuk do ta kem këtë problem si sot. Por, derisa kjo të ndodhë… sinqerisht nuk e shoh që kjo të ndodhë së shpejti”, u shpreh Kingu.

Duke luajtur 89 minuta në dy ndeshjet e fundit, James edhe një herë përsëriti nevojën që ekipi ka për një organizator të lojës.

“Ne nuk jemi më të mirë se vitin e kaluar, kjo është pikëpamje e imja personale. Ne jemi një top ekip i rëndë. Unë shpresoj se ne të mos jemi të kënaqur si klub. Unë shpresoj që ne nuk jemi të kënaqur. Thjesht shpresoj të mos jemi të kënaqur”.

“Nuk dua të disrespektoj DeAndre Ligginsin dhe Kay Felderin, por vërtet mendoni se ne mund të mbështetemi tek ata që të fitojmë një ndeshje në playoff? Nuk dua t’i përuli ata. Por, nuk është e drejt kjo ndaj tyre”, shpërtheu LeBron.

James me kujdes iu shmang fajësimit të trajnerit Tyronn Lue, teksa tha se menaxheri gjeneral i klubit, David Griffin, është në dijeni për mendimin e tij për përbërjen e skuadrës.

“Është e vështirë për tarjnerin sepse ne jemi në një proces kur duam ta fitojmë një dreq titulli. Do të ishte e padrejt që ta pyesnim Dellavedovan të luante në vitin e parë të tij në NBA në një ekip që tenton ta fitojë titullin. Ne po bëjmë gabim duke i thënë Kay Felderit të jetë përkrahës i një lojtari që është një dreq superylli, në vend që të jetë një zëvëndësues i një lojtari të dëshmuar që e zëvëndëson superyllin. A e dini çka po them?”.

“Unë nuk kam probleme me drejtuesit e kubit. I kam thënë Griffinit në fytyrë, kështu që nuk dua që këtë ta lë vetëm për mediat. Unë e shoh Griffinin shpesh. Nëse unë kam një gjë për të thënë, ia them në fytyrë. Ne kemi nevojë për një dreq organizatori. Unë nuk po them se kjo mund të gjendet thjesht, sikurse kur del për të kërkuar ndonjë pemë për shtëpi. Unë s’po them kështu”, shtoi James, shkruan Telegrafi.

Me Jamesin dhe Irvingun në përbërje të skuadrës, Cavaliers kanë dy njerëz që mund të organizojnë aksione. Por, për një ekip që dëshiron të mbrojë titullin, Cleveland është jashtëzakonisht i dobët në stol, gjë që e bën Jamesin dhe Irvingun të jenë të kyçur për shumë minuta gjatë ndeshjeve.

“Për shumicën e ndeshjeve, të gjitha ekipet që luftojnë për titull kanë djemë që janë të gatshëm të vijnë nga stoli. Thjesht është, paramendoni çka nëse lëndohet Kyrie? Për dy javë. Të themi dy javë. Çka nëse unë lëndohem për tri javë?”.

“Deri tash viti 2017 ka qenë m*t”, përfundoi tri herë fituesi i MVP. /Telegrafi/