Shpallet në kërkim vëllai i Besar Nimanit nga Gjykata e Qarkut në Bielefeld

Berat Nimani është shpallur në kërkim nga Gjykata e Qarkut në Bielefeld, pasi dyshohet për tentim vrasje. Ai konsiderohet si i dyshuari kryesor për plagosjen e katër personave të mërkurën para kësaj gjykate, raporton mediumi gjerman “WDR“.

Të enjten, autoritetet gjermane lëshuan disa njoftime zyrtare lidhur me rastin, duke përfshirë edhe shpalljen në kërkim të Berat Nimanit.

Policia ka bërë publike detaje mbi identitetin e tij dhe ka kërkuar ndihmën e qytetarëve për lokalizimin dhe kapjen e tij.

“Gjyqtari hetues i Gjykatës së Qarkut në Bielefeld ka lëshuar një urdhër-arresti ndaj këtij personi për katër akuza për tentim vrasje, që kanë shkaktuar lëndime të rënda trupore,” thuhet në një deklaratë të përbashkët të Prokurorisë dhe Policisë së Bielefeldit.

Lexo po ashtu Motra e Besar Nimanit dyshohet se tentoi të fuste një thikë në sallën e gjyqit

Gjatë ditës së parë të gjykimit, Berat Nimani deklaroi për “Bild” se një nga autorët e vrasjes së vëllait të tij, Besarit, vazhdon të jetë i lirë dhe se familja e tij ka jetuar në ankth të vazhdueshëm që nga ajo kohë.

Avokati i tij, Peter Wuller, ka theksuar se klienti i tij mohon çdo përfshirje në këtë ngjarje dhe është i gatshëm të dorëzohet në ditët e ardhshme.

“Kam zhvilluar disa biseda me z. Nimani menjëherë pas incidentit në mes të ditës në Bielefeld. Ai më kërkoi ta përfaqësoja ligjërisht. Situata është ende e paqartë. Pasi të kem një panoramë të plotë të rastit dhe të konsultohem me prokurorin, klienti im do të paraqitet në polici dhe do të dorëzohet,” tha Wuller.

Ai shtoi: “Berat Nimani më siguron për pafajësinë e tij dhe pretendon se nuk ka asnjë lidhje me të shtënat jashtë gjykatës.”

Lexo po ashtu Vëllai i Besar Nimanit kishte paralajmëruar se do të hakmerrej nëse autoritetet gjermane nuk do të reagonin

Sipas dëshmive të disa personave në vendngjarje, Berat Nimani dhe motra e tij u panë duke u larguar me një makinë të zezë menjëherë pas incidentit.

Gjithashtu, disa pjesëmarrës në seancën gjyqësore vunë re se të dy ata u larguan nga salla përpara përfundimit të procesit. /Telegrafi/