Shkëndija po shkëputet në tabelë, Shkupi vazhdon të radhit fitoret

Java e 21-të e Ligës së Parë të futbollit në Maqedoninë e Veriut konfirmoi formën e shkëlqyer të Shkëndijës dhe FC Shkupit, ndërsa Voska Sport rikthehet te fitorja dhe Struga vazhdon krizën e rezultateve, njofton Telegrafi.

Shkëndija vazhdon dominimin në pjesën pranverore, duke regjistruar fitoren e katërt radhazi. Tetovarët mposhtën Tikveshin me rezultat minimal 1-0, falë një goli spektakolar me thembër nga nigeriani Alhassan në minutën e 35-të. Me këtë fitore, Shkëndija vazhdon të kryesojë tabelën dhe po shkëputet nga ndjekësit.

FC Shkupi nuk ndalet, duke shënuar fitoren e pestë radhazi. Në Çair, bardheblutë mposhtën Pelisterin 3-1, me dy gola nga Ibishi dhe një tjetër nga Ajeti. Mysafirët shënuan golin e nderit me Ivanovskin nga pika e bardhë. Edhe pse me një ekip të reduktuar, Shkupi vazhdon të mbetet në garë për kreun.

Voska Sport shënoi një fitore të rëndësishme 3-1 kundër Brerës. Kroati Vinogradac, ganezi Osei dhe Ademi ishin realizuesit për ekipin nga Ohri, ndërsa Brera zbuti disfatën në fund me golin e Fahd N’Dzengue.

Struga Trim Lum nuk po gjen formën as me trajnerin e ri Illço Gjorgjioski. Struganët u mposhtën 3-1 nga Sileksi në Kratovë, duke humbur terren në garën për titullin kampion.

Gostivari nuk shkoi më shumë se një barazim 0-0 kundër Rabotniçkit, duke regjistruar barazimin e katërt në pesë ndeshjet e fundit. Po me të njëjtin rezultat përfundoi edhe përballja mes Vardarit dhe Besës, me të dyja skuadrat që ndanë pikët. /Telegrafi/

Rezultatet e Javës së 21-të

• Shkëndija – Tikveshi 1-0
• Shkupi – Pelisteri 3-1
• Voska Sport – Brera 3-1
• Sileksi – Struga TL 3-1
• Gostivari – Rabotniçki 0-0
• Vardari – Besa 0-0

Java e 22-të (05.03.2025, ora 14:00)

• Struga – Shkëndija
• Tikveshi – Shkupi
• Brera – Gostivari
• Besa – Sileksi
• Pelisteri – Voska Sport
• Rabotniçki – Vardari