SHBA: Rebelimi i Wagnerit zbuloi çarje në Rusi, është një sfidë e paparë

Një kryengritje nga grupi mercenar Wagner ka krijuar një sfidë të paprecedentë për presidentin rus Vladimir Putin, duke ekspozuar “çarje” në udhëheqjen e tij që mund të vazhdojnë për javë ose muaj, tha Sekretari amerikan i Shtetit Antony Blinken.

Blinken dhe anëtarët e Kongresit të SHBA thanë në një seri intervistash televizive të dielën, se trazirat në Rusi e kanë dobësuar Putinin në mënyra që mund të ndihmojnë Ukrainën të zhvillojë një kundërofensivë kundër forcave ruse në tokën e saj, dhe mund të përfitojnë shtetet fqinje baltike dhe Polonia.

“Unë nuk mendoj se ne e kemi parë aktin përfundimtar”, tha Blinken për televizionin ABC pas përfundimit të kryengritjes nga forcat e udhëhequra nga Yevgeny Prigozhin, transmeton Telegrafi.

Blinken tha se tensionet e nxitura nga kryengritja ishin krijuar prej muajsh, duke shtuar se kërcënimi i kaosit të brendshëm mund të ndikojë në aftësitë ushtarake të Rusisë në Ukrainë.

“Kemi parë të shfaqen çarje shtesë në fasadën ruse. Është shumë herët të thuhet se ku do të shkojnë dhe kur do të arrijnë atje. Por, me siguri, ne kemi të gjitha llojet e pyetjeve të reja me të cilat Putini do të duhet të trajtojë në javët dhe muajt e ardhshëm”, tha Blinken për televizionin NBC.

Blinken i përshkroi trazirat si një “çështje të brendshme” për Putinin.

“Ne jemi të përqendruar me vendosmëri dhe pa u dorëzuar në Ukrainë, dhe sigurojmë që ajo të marrë atë që i nevojitet për të mbrojtur veten dhe për të kthyer territorin e pushtuar nga Rusia”, shtoi Sekretari amerikan.

Zyrtarët amerikanë presin që së shpejti të mësojnë më shumë rreth ngjarjeve që u shpalosën në Rusi, duke përfshirë detajet e marrëveshjes me Prigozhinin, të ndërmjetësuar nga presidenti bjellorus Alexander Lukashenko, që luftëtarët e Wagner-it të kthehen në bazat e tyre.

“Është e mundur që Putini nuk donte të zbriste në nivelin e negociatave të drejtpërdrejta me Prigozhin”, shtoi Blinken. /Telegrafi/