Botë Nga Bota

SHBA po “lëviz asete shtesë” në Lindjen e Mesme ndërsa Izraeli përgatitet për sulm të mundshëm nga Irani

Para 9 muajve

Ushtria izraelite thotë se ka përgatitur plane për t’iu përgjigjur një sulmi të mundshëm iranian.

Zëdhënësi i ushtrisë, Daniel Hagari, tha të premten vonë se Izraeli është gati për një “skenar të ndryshëm” që përfshijnë veprime mbrojtëse dhe sulmuese.

Ai tha gjithashtu se shefi ushtarak i Izraelit ka përfunduar një vlerësim të situatës me kreun e Komandës Qendrore të SHBA, Erik Kurilla, i cili po viziton Izraelin, shkruan Euronews, përcjell Telegrafi.

“Mbrojtja jonë është e gatshme dhe di se si të merret me çdo kërcënim veç e veç”, u tha Hagari gazetarëve.

“Përveç mbrojtjes, ne jemi të përgatitur për të sulmuar. Ne jemi gati të sulmojmë me një sërë kapacitetesh dhe dimë si të veprojmë dhe të mbrojmë popullin e Izraelit”.

Ndryshe, Izraeli është përgatitur për një sulm të mundshëm iranian që kur një sulm ajror vrau dy gjeneralë iranianë në kryeqytetin sirian të Damaskut javën e kaluar.

Hagari tha se vizita nga Kurilla ka për qëllim “të garantojë se koordinimi mes nesh është i ngushtë”.

Ndërkohë SHBA po “lëviz asete shtesë” në Lindjen e Mesme, ka thënë një zyrtar i mbrojtjes për Sky News.

Masa do të “forcojë përpjekjet rajonale të parandalimit dhe do të rrisë mbrojtjen e forcave për forcat amerikane”, citohet të ketë thënë zyrtari.

Gazetari amerikan i Sky News, Mark Stone thekson se nuk janë dhënë detaje të mëtejshme.

“Kjo do të thotë se më shumë pajisje ushtarake po zhvendosen ose do të zhvendosen në rajon për të bërë dy gjëra – të përpiqen të pengojnë Iranin nga ndërmarrja e ndonjë veprimi masiv dhe gjithashtu për të mbrojtur forcat ekzistuese amerikane që janë në rajon”.

“Unë mendoj se konsensusi midis ekspertëve është se iranianët do të përgjigjen, por ata pothuajse me siguri do të përgjigjen kundër Izraelit drejtpërdrejt në vend të ndonjë ushtrie amerikane në rajon”.

“Megjithatë, si do të duket ajo përgjigje dhe çfarë do të thotë për sa i përket një përgjigjeje izraelite, ne nuk e dimë ende”.

Ndryshe, lidhur me një sulm të mundshëm të Iranit ndaj Izraelit është deklaruar edhe presidenti amerikan, Joe Biden.

Ai u tha gazetarëve në Shtëpinë e Bardhë të premten se ai pret që Irani të sulmojë Izraelin “herët a vonë”.

Ndërsa i pyetur se cili është mesazhi i tij për Iranin tani, presidenti tha: “Mos e bëj”.

Në përgjigje të pyetjeve nga gazetarët në sallë, nëse trupat amerikane ishin në rrezik – Biden u kthye në podium dhe tha se Shtetet e Bashkuara janë “të përkushtuara” për mbrojtjen e Izraelit.

SHBA ka qenë në gatishmëri të lartë për një sulm të rëndësishëm hakmarrës iranian ndaj Izraelit në ditët e fundit, ndërsa frika rritet për një luftë më të gjerë rajonale. /Telegrafi/