SHBA-ja reagon ashpër: T’i jepet fund të gjitha kërcënimeve të dhunës dhe frikësimit – barrikadat të largohen menjëherë në veri

Shtetet e Bashkura të Amerikës kanë shprehur shqetësimin e tyre të thellë për situatën aktuale në veri të Kosovës.

Në një deklaratë të përbashkët, Ambasada e SHBA-së në Prishtinë dhe Beograd, kanë kërkuar që menjëherë të largohen barrikadat në veri.

“Ata që ngritën barrikada të paligjshme duhet t’i largojnë ato menjëherë. Ne presim që t’i jepet fund të gjitha kërcënimeve të dhunës dhe frikësimit”, thuhet në reagim.

Po ashtu theksohet se arrestimi i qytetarit serb, ish-zyrtar i Policisë së Kosovës, po përdoret si justifikim për bllokime të paligjshme të rrugëve si dhe kërcënime dhe frikësime ndaj autoriteteve kosovare dhe popullatës lokale.

SHBA- ja ka dënuar fuqishëm dhe e ka konsideruar si të papranueshme të gjitha sulmet ndaj Policisë së Kosovës dhe EULEX-it.

“Ne e kuptojmë se autoritetet kosovare kanë arrestuar një individ të dyshuar për përfshirje në një sulm të dhunshëm ndaj autoriteteve kosovare të zbatimit të ligjit dhe komisionit zgjedhor. Ky arrestim po përdoret si justifikim për bllokime të paligjshme të rrugëve si dhe kërcënime dhe frikësime ndaj autoriteteve kosovare dhe popullatës lokale”, thuhet më tej.

SHBA-ja ka bërë thirrje të gjithëve që të ushtrojnë përmbajtje maksimale, të marrin masa të menjëhershme për të arritur një de-përshkallëzimin e situatës dhe të përmbahen nga aktet provokuese.

“Palët të punojnë në kuadër të Dialogut të lehtësuar nga BE-ja për të zgjidhur çështjet shqetësuese”.

“Dënojmë fuqishëm si të papranueshme të gjitha sulmet ndaj agjencive të sigurisë kosovare dhe ndërkombëtare. Ne shprehim vlerësimin dhe mbështetjen tonë të plotë për Forcën e NATO-s në Kosovë (KFOR) për përpjekjet e saj për të garantuar sigurinë dhe lirinë e lëvizjes dhe për Misionin e Bashkimit Evropian për Sundimin e Ligjit (EULEX)”, thuhet në fund të reagimit. /Telegrafi/

The United States is deeply concerned about the current situation in the north of Kosovo. Those who erected illegal roadblocks should dismantle them immediately. Read the full statement: https://t.co/SOcOcu3kWK

— Ambassador Jeff Hovenier (@USAmbKosovo) December 11, 2022