Sekuestrohen 34 mijë e 750 euro në Gjirokastër

Në Kakavijë të Gjirokastrës, Policia e Shtetit ka sekuestruar 34 mijë e 750 euro.

Në njoftimin e bërë për media thuhet se Policia Kufitare, në bashkëpunim me Strukturat Doganore Antitrafik, ka parandaluar dhe goditur një tjetër rast të tentativës për transferim të parave në mënyrë të kundërligjshme, transmeton Telegrafi.

“Në vijim të zbatimit të masave të shtuara për luftën ndaj krimeve ndërkufitare, si rezultat i kontrolleve të shtuara, Policia Kufitare e Kakavijës, në bashkëpunim edhe me Strukturat Doganore Antitrafik, gjatë kontrollit në dalje të Republikës së Shqipërisë, në një automjet që drejtohej nga shtetasi S. S., 36 vjeç, banues në Berat, gjeti të fshehura në një çantë një shumë prej 34.750 eurosh të cilat ky shtetas tentoi t’i kalonte në Greqi pa i deklaruar para autoriteteve doganore”, thuhet në njoftim.

Më tej në njoftim thuhet në vendngjarje kanë mbërritur specialistët për Hetimin e Krimit Ekonomik e Financiar në DVP Gjirokastër, të cilët kanë bërë sekuestrimin e shumës së eurove në cilësinë e provës materiale dhe në përfundim të veprimeve kanë proceduar penalisht shtetasin S. S., për veprën penale “Mosdeklarim i të hollave dhe sendeve me vlerë në kufi”./Telegrafi/