Sean Penn bën marrëveshje me Krakow për të ndihmuar refugjatët ukrainas

Fondacioni i bamirësisë së Sean Penn ka nënshkruar një marrëveshje për të ofruar ndihmë për refugjatët ukrainas.

Aktori dhe regjisori fitues i dyfishtë i “Oscar” ishte në qytetin jugor polak të Krakow për të nënshkruar një marrëveshje që do të krijonte një qendër në qytet, e cila do të ofrojë njohuri për kujdesin ndaj refugjatëve.

Qendra do të punësojë gjithashtu staf lokal, i cili do të trajnohet për të ndihmuar refugjatët.

E themeluar në vitin 2010 për të ndihmuar viktimat e tërmetit në Haiti, fondacioni CORE (Community Organized Relief Effort) tha se tani do të fokusohet në ndihmën e refugjatëve ukrainas në Poloni dhe Rumani.

Fondacioni do të ofrojë gjithashtu mbështetje financiare për rinovimin e ndërtesave të cilat Krakow i ka caktuar për të strehuar deri në 50 refugjatë.

Lexo po ashtu Aktori Sean Penn u bën thirrje SHBA-së dhe Polonisë që të furnizojnë Ukrainën me avionë në mes të sulmeve ruse

Polonia dhe Rumania kanë marrë shumicën e refugjatëve që janë larguar nga Ukraina që kur Rusia filloi pushtimin e saj.

Penn, i cili themeloi dhe drejton fondacionin, tha në një konferencë shtypi në Krakow se megjithëse ishte duke punuar në një film dokumentar për sulmin rus në Ukrainë, detyra më e rëndësishme sot ishte të ndihmonte popullin ukrainas.

Ai gjithashtu vlerësoi polakët për mënyrat e shumta që ata kanë ndihmuar refugjatët.

CORE shkroi në faqen e saj të internetit se ndihma e saj për refugjatët ukrainas në Poloni dhe Rumani do të përfshijë gjithashtu furnizime me ushqim si dhe transport. /Telegrafi/