Scholz mbron vendimin për raketat me rreze të gjatë veprimi – “i kujdesshëm” edhe për anëtarësimin e Ukrainës në NATO

Kancelari gjerman Olaf Scholz vizitoi Ukrainën për herë të parë në më shumë se dy vjet të hënën dhe u zotua të vazhdojë të mbështesë Kievin në luftën e tij kundër Rusisë.

Megjithatë, ai qëndroi i vendosur në vendimin e tij për të mos furnizuar Kievin me raketa me rreze të gjatë veprimi Taurus, shkruan Euronews, përcjell Telegrafi.

Ndërsa Gjermania ka qenë një nga aleatët më të fortë të Ukrainës, Scholz i ka rezistuar dy prej kërkesave kryesore të presidentit Volodymyr Zelensky: dërgimin e raketave Taurus të prodhimit gjerman dhe suedez dhe përshpejtimin e rrugës drejt anëtarësimit në NATO.

Duke u përballur me zgjedhjet e parakohshme në shkurt, Scholz mbrojti qasjen e tij të kujdesshme, duke e bërë atë si një ekuilibër midis mbështetjes së fuqishme për Ukrainën dhe minimizimit të rrezikut të përshkallëzimit të konfliktit në një konfrontim të drejtpërdrejtë NATO-Rusi.

“Kjo nuk e pakëson mbështetjen tonë, e cila është shumë e gjerë dhe që është e rëndësishme për mua të them – do të mbetet e gjerë”, ka thënë Scholz në Kiev.

Scholz ka qenë i kujdesshëm edhe në lidhje me bisedimet për anëtarësimin e shpejtë në NATO të Ukrainës. Ai ka theksuar rëndësinë e gjetjes së një rruge drejt paqes, për të cilën ai këmbëngul se “nuk duhet të zgjidhet pa e përfshirë Ukrainën”.

Vizita e Scholz pason tensionet e fundit pasi Zelensky e kritikoi atë për një bisedë telefonike me Vladimir Putinin.

Zelensky tha se nuk ishte dakord me telefonatën e Scholz me presidentin rus, duke shtuar se ajo mund të nxisë telefonata me liderë të tjerë, duke reduktuar ndoshta izolimin ndërkombëtar të Putinit dhe duke legjitimuar pushtimin e tij në shkallë të plotë të Ukrainës.

Scholz mbrojti telefonatën, duke thënë se ai synonte t’i kujtonte Putinit se Ukraina është një komb sovran me të drejtën për të përcaktuar të ardhmen e saj.

Ai gjithashtu theksoi se i ka përcjellë Putinit mesazhin se Ukraina nuk është e vetme dhe partnerët e saj do të vazhdojnë mbështetjen e tyre. /Telegrafi/