Samsung përgatit syze të mençura, për të rivalizuar me Google Glass

Një regjistrim i ri i patentës në Agjencinë e Patentave dhe të Drejtave Intelektuale në Korenë e Jugut tregon se Samsung është duke punuar në një pajisje të re, për të cilën besohet se do të jetë një përgjigje e mundshme për syzet e mençura të Google Glass.

Sipas burimeve të para të informacionit thuhet se pajisja e re e Samsung e lidhur me internet, mundëson dëgjimin e muzikës dhe pranimin e thirrjeve telefonike përmes dëgjueseve në veshë, të cilat janë të integruara në kornizën e syzeve.

Megjithatë, nga vizatimet e Samsung ende nuk dihet nëse syzet e reja të kompanisë do të jenë të pajisura me kontrollin e prekje dhe kamerën e ngjashme me Google Glass, apo nëse syzet e Samsung do të lidhet direkt me internetin në mobil apo të lidhet direkt me telefonin e mençur.

Në anën tjetër, Google është duke e testuar një version të hershëm të Google Glass me 10,000 njerëz në SHBA, për t’i dhënë publikut një vështrim të parë mbi syzet e lidhura me internet.

Version i hershëm i Google Glass mund të bëjë fotografi, të incizojë video, të navigojë nëpër harta dhe punon pa telefon të mençur. / Telegrafi /