RTK-ja në krizë financiare, Sindikata kërkon veprim urgjent nga Kuvendi

Sindikata e Punëtorëve të RTK-së ka shprehur një zhgënjim të thellë ndaj legjislaturave të Kuvendit të Kosovës për moszgjidhjen e statusit të Radio Televizionit të Kosovës (RTK).

Sindikata thekson nevojën e domosdoshme për miratimin e një ligji të ri që do të rregullonte çështjet e pronës dhe financimit të pavarur të RTK-së, si dhe do të siguronin funksionimin e qëndrueshëm të transmetuesit publik.

“Miratimi i një ligji të ri që do të rregullonte çështjet e pronës dhe financimit të pavarur të transmetuesit publik është mëse i domosdoshëm për funksionimin e tij. Jemi të indinjuar që edhe në kohë fushatash zgjedhore dëgjojmë premtime për rritje pagash, ndërkohë që RTK-ja operon me një buxhet 2.2 milionë euro më të ulët. Për më tepër, rritja e pagave për punonjësit e RTK-së nuk ka ndodhur që nga viti 2006, duke dëshmuar një neglizhencë të madhe ndaj të drejtave të tyre”, thuhet në reagimin e Sindikatës së RTK-së.

Sindikata e RTK-së ka kërkuar nga Kuvendi i Kosovës dhe partitë politike që të trajtojnë urgjentisht çështjen e buxhetit dhe të mbështesin transmetuesin publik, i cili ndodhet në një gjendje të rënduar financiare dhe infrastrukturore.

Nëse ky problem nuk zgjidhet, Sindikata paralajmëron se do të detyrohet ta drejtojë çështjen në Gjykatën Kushtetuese.

“Punëtorët e RTK-së, përmes punës dhe tatimeve të tyre, kontribuojnë në zhvillimin e shtetit tonë. Mungesa e mbështetjes nga themeluesi, është një dëm i madh për të ardhmen e transmetuesit publik. Sindikata informon publikisht Kuvendin e Kosovës dhe partitë politike se, nëse çështja e buxhetit të RTK-së nuk trajtohet me urgjencë, do të jemi të detyruar ta adresojmë këtë problem në Gjykatën Kushtetuese”, thuhet mes tjerash në deklaratë.

Sindikata apelon për mbështetje të menjëhershme për RTK-në, duke theksuar se rëndësia e saj për demokracinë dhe shtetin është e pakontestueshme. /Telegrafi/