RMV: Këtë vit qershori pa qershi, moti i keq i ka dëmtuar

Edhe pse është sezona e qershive, ato janë bërë luks për qytetarët, ato mezi arrihet të gjenden në treg. Në Bit Pazar ato i pamë në sasi të vogla vetëm në dy tre tezga. Qytetarët habiten me një situatë të tillë dhe po aq me çmimin e lartë të tyre në këtë sezonë.

“A po, është problem interesant, problem është, nuk e di ndoshta koha që ka ndryshu, natyra po ndryshon, klima po ndryshon, ja edhe qershi nuk ka, nuk ka interesant. Si të ndryshojë klima, kanë ndryshuar edhe ushqimet, shpresojmë të bëhet sikur ka qenë më herët”, deklaroi një qytetar.

“Çmimet janë të shtrenjta, po edhe koha është ashtu, e shohim se krizë e keqe është, por për shkak të krizës, rrogat janë të dobëta, pensionet janë të dobëta, sdi çfarë të dhem tjetër gjë”, u shpreh një qytetar.

Shitësit pajtohen se kërkesa për qershi është shumë e lartë, por thonë se për shkak të motit të ftohtë qershitë ose janë vonuar ose janë dëmtuar dhe prishen shpejtë.

“Furnizimi është pak i dobët për arsye se edhe moti nuk ka qenë shumë i mirë, prandaj ka pak shitje, nuk ka qershi sa duhet, por njerëzit janë të interesuar i kërkojnë. Në disa vende ke, në vende të tjera jo, pasi moti është shumë i ligë, prandaj nuk kemi furnizim të rregullt”, deklaroi një shitëse.

“Qershitë që pjeken më herët ata i ka dëmtuar, të tjerat që dalin më vonë, nuk janë të dëmtuara, për momentin çmimi i qershive është i lartë sepse nuk ka… Ka kërkesë por çmimet e qershive janë shtrenjtë”, u shpreh një shitës.

“Kushtet kanë ndikuar shumë, për këtë arsye nuk ka, për qershitë”, tha një shitës.

“Janë pak të dobëta, janë të lënduara shumë prej shiut, ja ku i ke edhe të prishura shumë brenda tyre, por çfarë të bëjmë… Shumë, ja çmimi prej në 80, në vend se të jetë 100 në 80 ka rënë.” – shitës.