Rikthehet pas dy vitesh “Ballo Shqiptare”, VIP të shumtë marrin pjesë në eventin që promovon traditën

Sonte (e shtunë) është mbajtur balloja shqiptare, e organizuar pas dy vitesh pauzë.

Ky organizim i bërë nga Dielza Kolgeci dhe Afërdita Paqarada, edhe një herë vuri në pah elementet e kulturës dhe traditës shqiptare, duke nisur që nga veshjet e deri tek ushqimi, muzika dhe gjithçka tjetër.

Mbrëmja e zhvilluar në Hotelin “Emerald” në Prishtinë, pati të ftuar personazhe të shumtë VIP nga sfera të ndryshme.

Të pranishmit ishin detyruar të respektojnë kodin e veshjes, duke u shfaqur me detaje me elemente tradicionale apo me veshje elegante.

Dy “miss”-et e dikurshme të Kosovës, Diellza dhe Afërdita, dukeshin rrezatuese me paraqitjen e tyre në këtë mbrëmje.

Diellza para pak ditësh në një prononcim për Telegrafin, kishte shpalosur detajet e këtij organizimi, që u rikthye pas dy vitesh.

Lexo po ashtu Rikthehet pas dy vitesh pauzë për shkak të pandemisë - çfarë e karakterizon edicionin e gjashtë të mbrëmjes kulturore “Ballo Shqiptare”?

“Është organizimi i parë pas pandemisë dhe që të gjithë po e presin me shumë dëshirë sepse ka kohë që qyteti ynë nuk është gjallëruar dhe ne shumë besojmë që gjithë ky mund do të shfaqet në mënyrën më të mirë të mundshme ashtu si i ka hije dhe ashtu si e meriton tradita jonë”, kishte thënë Kolgeci për Telegrafin.

Kjo është balloja e gjashtë shqiptare me radhë, gjersa si event u organizua për herë të parë në vitin 2015. /Telegrafi/