Rezultate pozitive pas dozës së parë, vaksina e Pfizer ka marrë vlerësime pozitive nga Agjencia amerikane e Ushqimit dhe Barnave

Vaksina kundër coronavirusit e zhvilluar nga kompanitë Pfizer dhe BioNtech, ka dhënë rezultate pozitive qysh pas dhënies së dozës së parë, thuhet në analizën e publikuar nga Agjencia amerikane e Ushqimit dhe Barnave (FDA).

Siç thonë nga FDA, kjo vaksinë është jashtëzakonisht efikase, ku pikërisht për këtë ka marrë notë vlerësimi “A+”, transmeton Telegrafi.

Analiza e FDA vjen para takimit të këshilltarëve të pavarur gjatë të enjtes, që do të jap rekomandimet nëse FDA duhet të miratojë përdorimin e vaksinës apo jo. Analiza e përpiluar në 53 faqe në fakt do të përdoret nga grupi këshillëdhënës i hulumtuesve, me rastin e dhënies së rekomandimeve.

Nëse FDA miraton përdorimin e vaksinës së Pfizer dhe BioNtech, kjo do t’i mundësonte njerëzve të marrin vaksinën edhe pse është akoma në fazën e testimeve klinike të detajuara, shkruan CNBC.

Siç qëndrojnë aktualisht gjërat, ekzistojnë gjasa të mëdha që FDA të miratojë vaksinën, pavarësisht se në analizë thuhet se “nuk janë konfirmuar problemet e sigurisë që do të parandalonin miratimin e vaksinës për përdorim urgjent”.

Analiza gjithashtu ka konfirmuar që vaksina është efikase tek të gjitha gjinitë, racat dhe grupet etnike, por edhe tek personat me sëmundje tjera përcjellëse që konsiderohen si grupe me rrezikshmëri të lartë.

Vaksina e Pfizer dhe BioNtech gjithashtu është efikase në parandalimin e coronavirusit qysh në dozën e parë, ka thënë për New York Times, William Grubber, ish-nënkryetari i ekipit të testimit klinik dhe zhvillimit të vaksinës. Megjithatë, Grubber thekson se nevojiten dy doza për mbrojtje maksimale.

Sipas analizës së FDA-së, kjo vaksinë shoqërohet me simptoma të lehta si kokëdhembje, dhimbje të muskujve, të nyjeve dhe reaksione të kohëpaskohshme të ngjashme me ato  të pickimeve të mushkonjave.

Siç raporton Wall Street Journa, nëse këshillëdhënësit të enjten ofrojnë rekomandime të nevojshme për miratimin e vaksinës, FDA do të mund të fillonte me shpërndarjen e vaksinës qysh këtë fundjavë. /Telegrafi/